Dec 29, 2007

ഫോട്ടോഷോപ്പ് ടിപ്‌സ് . 1 (Photoshop Tips. 1)

നിങ്ങള്‍ വര്‍ഷങ്ങളായി ഫോട്ടോഷോപ്പ് ഉപയോഗിക്കുന്ന വ്യക്തി ആയിരുന്നാലും ശരി, ഓരോ ദിവസവും പുതിയ പുതിയ കാര്യങ്ങള്‍ നിങ്ങള്‍ ഫോട്ടോഷോപ്പില്‍ കണ്ടെത്തിക്കൊണ്ടേയിരിക്കും. അതിശയകരമായ ധാരാളം പ്രയോഗങ്ങള്‍ ഫോട്ടോഷോപ്പിലുണ്ട്. നിങ്ങള്‍ ഒരു തുടക്കക്കാരനോ എക്സ്പേര്‍ട്ടോ ആവട്ടെ, താഴെ പരിചയപ്പെടുത്തുന്ന ഫോട്ടോഷോപ്പിലെ രസകരമായ ടിപ്‌‌സുകളിലൂടെ പ്രയാസകരമായ ജോലികള്‍ പോലും എളുപ്പത്തില്‍ ചെയ്യാന്‍ നിങ്ങള്‍ പ്രാപ്തരാവുന്നു.

ഈ ടി‌പ്‌സുകളെ പത്തായി തരം തിരിച്ചിരിക്കുന്നു.

Interface Tips [ 18 Tips ]

Tool Tips [ 11 Tips ]

Command Tips [ 21 Tips ]

Selection Tips [ 8 Tips ]

Layer Tips [ 14 Tips ]

Tips for Guides & Rulers [ 7 Tips ]

Navigation & HotKey Tips [ 7 Tips ]

Tips for Duplicating [ 10 Tips ]

Type Tips [ 10 Tips ]

ImageReady Tips [ 14 Tips

ആദ്യം ഇന്റെര്‍ഫെയ്സ് ടിപ്സ് 18 എണ്ണം ഇതാ പിടിച്ചോളൂ…ബാക്കിയുള്ളവ പിന്നാലെ.

INTERFACE TIPS

1. റ്റാ‍ബ് കീ പ്രെസ്സ് ചെയ്താല്‍ റ്റൂള്‍ബാര്‍ ഹൈഡ് ആകുമെന്നു നിങ്ങള്‍ക്കറിയാം. എന്നാല്‍ Shift+Tab പ്രെസ്സ് ചെയ്താല്‍ പാലറ്റുകള്‍ (palettes) മാത്രം hide ചെയ്യാം. toolbar മാത്രം visible ആകും.

2. പാലറ്റുകള്‍ സ്ക്രീനിന്റെ ഏറ്റവുമടുത്ത വശത്തേക്ക് Snap ചെയ്യുവാന്‍ പാലറ്റിന്റെ റ്റൈറ്റില്‍ ബാറില്‍ Shift-click ചെയ്താല്‍ മതി.

3. പാലറ്റുകള്‍ Minimize ചെയ്യാന്‍ പാലറ്റിന്റെ റ്റൈറ്റില്‍ ബാറില്‍ double-click ചെയ്താല്‍ മതി.

4. അതത് റ്റൂളുമായി ബന്ധപ്പെട്ട ഓപ്ഷന്‍ ബാര്‍ പ്രത്യക്ഷപ്പെടാന്‍ റ്റൂള്‍ബാറിലെ റ്റൂള്‍ ഐക്ക്ണില്‍ Enter അല്ലെങ്കില്‍ double-clickചെയ്താല്‍ മതി.
അല്ലെങ്കില്‍ മെനുവില്‍ Window » Show Options.

5. ഫോട്ടോഷോപ്പ് വിന്‍ഡോയിലൂടെ നാവിഗേറ്റു ചെയ്യാന്‍ ഫോട്ടോഷോപ്പ് വിന്‍ഡോയുടെ താഴെ ഇടതു വശത്തായുള്ള സൂം ഫീല്‍ഡ് ഉപയോഗിക്കുക. എത്ര സൂം ആണോ വേണ്ടത് ആ നമ്പര്‍ എന്റര്‍ ചെയ്യുക. Shift+Enter ചെയ്താല്‍ സൂം ഫീല്‍ഡ് ആക്റ്റീവ് ആയിത്തന്നെ നില്‍ക്കും, നിങ്ങള്‍ക്ക് മറ്റു സൂം ലെവലുകള്‍ നല്‍കാം.

6. ഡോകുമെന്റ് സൈസ് വിവരങ്ങള്‍ മാറ്റാന്‍ ഫോട്ടോഷോപ്പ് വിന്‍ഡോയുടെ താഴ് ഭാഗത്തെ സ്റ്റാറ്റസ് ബാറിലെ സൂം ഫീല്‍ഡിനു വലതു വശത്തുള്ള ബാറിലെ > (ആരോ) ബട്ടണില്‍ ക്ലിക്ക് ചെയ്ത് മെനുവില്‍ നിന്നു ഇഷ്ടമുള്ള ഇന്‍ഫര്‍മേഷന്‍ തെരെഞ്ഞെടുക്കാം.
ആ ബാറില്‍ വെറുതേ ക്ലിക്ക് ചെയ്താല്‍ പ്രിന്റ് സൈസ് കാണാം. Alt-clickചെയ്താല്‍ image dimensions ഉം resolution നും Ctrl-click ചെയ്താല്‍ Tile information അറിയാം.

7. Foreground കളര്‍ കൊണ്ട് ഡോകുമെന്റിനു ചുറ്റുമുള്ള gray കാന്‍ വാസ് ബോര്‍ഡറുകള്‍ ഫില്‍ ചെയ്യണമെങ്കില്‍ അവിടെ Paint Bucket tool [K] ടൂള്‍ കൊണ്ട് Shift-click ചെയ്താല്‍ മതി.
പഴയ ഗ്രേ കളര്‍ തിരികെ വേണമെങ്കില്‍ foreground കളര്‍ 25% ഗ്രേ (R192,G192,B192) Paint Bucket tool [K] ടൂള്‍ കൊണ്ട് വീണ്ടും Shift-click ചെയ്താല്‍ മതി.

8. ഏതു ഡയലോഗ് ബോക്സിലേയും കാന്‍സല്‍ ബട്ടണ്‍ റീസെറ്റ് ബട്ടണാക്കി മാറ്റാന്‍ Alt key അമര്‍ത്തിപ്പിടിച്ചാല്‍ മതി. ഇങ്ങനെ നിങ്ങള്‍ക്ക് ഡയലോഗ് ബോക്സ് കാന്‍സല്‍ ചെയ്ത് വീണ്ടും വരാതെ തന്നെ കൊടുക്കുന്ന വാല്യൂകള്‍ മാറ്റിക്കൊടുക്കാന്‍ (റീസെറ്റ് ചെയ്യാന്‍) കഴിയും. വളരെ ഉപകാരപ്രദമാണിത്.

9. Precise Cursors ഓണ്‍/ഓഫ് ചെയ്യാന്‍ Caps Lock key ഉപയോഗിക്കുക.

10. ഫുള്‍സ്ക്രീന്‍ മോഡുകളിലൂടെ മാറി മാറിപ്പോകാന്‍ “F” കീ ബട്ടണ്‍ ഉപയോഗിക്കുക. ഫുള്‍സ്ക്രീന്‍ മോഡില്‍ നിന്നു കൊണ്ടു മെനു കാണണമെങ്കില്‍ Shift+F പ്രെസ്സ് ചെയ്താല്‍ മതി.

11. ഫോട്ടോഷോപ്പിന്റെ ഗ്രേ ബാക്ഗ്രൌണ്ടില്‍ Double-click ചെയ്താല്‍ Open കമാന്റ് ദൃശ്യമാകും.[Ctrl+O] (File » Open…).

12. Ctrl+Double-click ചെയ്താല്‍ പുതിയ ഡോകുമെന്റിനുള്ള ബോക്സ് വരും. .(ctrl+N) (File » New…).

13. കളര്‍ പാലറ്റിലെ (Color palette [F6] (Window » Show Color) കളര്‍ റാമ്പില്‍ Shift-click ചെയ്താല്‍ RGB, CMYK…എന്നിങ്ങനെ സ്പെക്ട്രം മാറി മാറി വരും. അല്ലെങ്കില്‍ കളര്‍ റാമ്പില്‍ right-click ചെയ്തും ഇഷ്ടമുള്ള കളര്‍ മോഡ് തെരഞ്ഞെടുക്കാം.

14. ഒരു ഇമേജ് വിന്‍ഡോയുടെ റ്റൈറ്റില്‍ ബാറില്‍ Right-click ചെയ്ത് Canvas Size, Image Size, Duplicate തുടങ്ങിയ ഫീച്ചേഴ്സ് എളുപ്പം തെരെഞ്ഞെടുക്കാം.

15. മൌസ് പോയിന്റര്‍ ഒരു ഇമേജ് വിന്‍ഡോയുടെ റ്റൈറ്റില്‍ ബാറില്‍ ഒന്നു ‘പോസ് ‘ ചെയ്താല്‍ (നിര്‍ത്തിവെച്ചാല്‍) ആ ഇമേജിന്റെ ഫുള്‍ പാത്ത് (ലൊക്കേഷന്‍) തെളിഞ്ഞു വരും.

16. കളര്‍ സ്വാഷസ് പാലറ്റില്‍ (Window » Show Swatches) ഇഷ്ടമുള്ള കളര്‍ കൂട്ടിച്ചേര്‍ക്കാന്‍ Foreground കളര്‍ സെലെക്റ്റ് ചെയ്തിട്ട് സ്വാഷസ് പാലറ്റിന്റെ ഒഴിഞ്ഞ ഗ്രേ സ്ഥലത്ത് വെറുതേ ക്ലിക്ക് ചെയ്താല്‍ മതി. ആഡ്ഡ് ചെയ്ത കളര്‍ റിമൂവ് ചെയ്യാന്‍ സ്വാഷസ് പാലറ്റില്‍ ആ കളറില്‍ Alt+click ചെയ്താല്‍ മതി.

17. ഫോട്ടോഷോപ്പിലെ ഒരു സ്ഥലത്തു നിന്നും മറ്റൊരിടത്തേക്കോ അല്ലെങ്കില്‍ മറ്റൊരു ആപ്ലിക്കേഷനിലേക്കൊ കളര്‍ വാല്യൂ കോപി പേസ്റ്റ് ചെയ്യാന്‍ കളര്‍ പിക്കറിലെ ഹെക്സാഡെസിമല്‍ കളര്‍ ഫീല്‍ഡ് ( # ) ഉപയോഗിക്കുക.

18. കര്‍വ് വിന്‍ഡോയുടെ Curves window [Ctrl+M] (Image » Adjust » Curves…) വലിപ്പം കൂട്ടുന്നതിനും കുറക്കുന്നതിനും കര്‍വ് വിന്‍ഡോയിലെ maximize / minimize button ഉപയോഗിക്കുക. ഗ്രിഡ് സൈസ് കൂട്ടുന്നതിനു കര്‍വ് വിന്‍ഡോയില്‍ Alt-click ചെയ്യുക.

Dec 27, 2007

നാ‍ടകീയ നാടകങ്ങള്‍ !

പള്ളിപ്പെരുന്നാളിനു നാടകം കളിക്കുന്നു ഇടവകയിലെ അമേച്ചര്‍ പയ്യന്മാര്. ബൈബിള് കഥ. ഇടവകേലെ പ്രമാണീടെ മകനു യേശു ആകണം. അറ്റ് ലീസ്റ്റ് ജോസഫ്.കാശിന്റെ അഹങ്കാരമാണ്. അവനാണ് നാടക സ്പോണ്‍സര്‍. 3 ദിവസം റിഹേഴ്സിയിട്ടും ലവന് ശരിയാകുന്നില്ല. ഒടുക്കം അവനു ഒരു സത്രക്കാരന്റെ റോള് നല്കി സത്രക്കാരനായിരുന്ന സണ്ണിക്കുട്ടിയെ ജോസഫാക്കി. അപ്പളേ പ്രമാണി മഹന് മനസ്സില് പറഞ്ഞു: നാടകം തട്ടേക്കേറട്ടെ, കാണിച്ചു തരാം.

നാടകം തുടങ്ങി. ജോസഫും മറിയവും സത്രങ്ങള് കയറി ഇറങ്ങുന്നു. ആരും മുറി കൊടുക്കുന്നില്ല. അവസാനം പ്രമാണി മകന്റെ സത്രത്തിലുമെത്തി. അവനും അവരെ അടിച്ചിറക്കണം. അങ്ങനെ പുല്‍‌ക്കൂട്ടില് പോയി പ്രസവിക്കണം.

അവര് സത്രത്തില് മുറിയുണ്ടോ എന്നന്വേഷിച്ചപ്പോള് സത്രക്കാരന്: "മുറിയുണ്ടോന്നോ? കൊള്ളാം നിങ്ങളെപ്പോലുള്ളവര്ക്കല്ലേ ഇവിടെ നറച്ചും മുറി....വന്നാട്ടെ,വന്നാട്ടെ, കേറിയാട്ടെ, വിശ്രമിച്ചാട്ടെ..."

ജോസഫ് ഞെട്ടി. മറിയം ഞെട്ടി. സംവിധായകന് ഞെട്ടി. അച്ചന് ഞെട്ടി. നാടകം ഇനി എങ്ങനെ മുന്നോട്ട് നീങ്ങും കര്‍ത്താവേ!

ജോസഫ് സത്രക്കാരന്റെ കാതില് പറഞ്ഞു: “റാസ്‌കല്‍, നാടകം കഴിയട്ടെ, കാണിച്ചു തരാം”. എന്നിട്ട് അകത്തേക്ക് കയറിയിട്ട് പെട്ടെന്ന് തിരികെ വന്നു:
“ഹും പന്നികള് പോലും കിടക്കാത്ത വൃത്തികെട്ട മുറികള്..അയ്യേ, മറിയേ, നമുക്കിവിടെ കിടക്കണ്ട. വാ വല്ല പുല്‍‌ക്കൂട്ടിലും പോയി കിടക്കാം...”

*******************

ഈശോ ചരിതം പുരോഗമിക്കുന്നു. ക്ലൈമാക്സായി. യേശുവിനെ കുരിശില് തറക്കുന്ന സീന്. അരങ്ങൊരുങ്ങിയപ്പോളാണ് ഒരു പ്രശ്നം എല്ലാവരും ശ്രദ്ധിക്കുന്നത്. കുട്ടിത്തോര്ത്തുടുത്തു നില്ക്കുന്ന യേശുവിന് കുടവയര്. ഫുള് ടൈം ളോഹ ആയിരുന്നതു കാരണം ആരുമത് ശ്രദ്ധിച്ചില്ല. കുടവയറുള്ള യേശുവോ!!! കുരിശായല്ലോ! ഒറ്റ സീനിനു വേണ്ടി നായകനെ മാറ്റാനും വയ്യ.
നായകന് തന്നെ ഉപായം പറഞ്ഞു: രണ്ടു മിനിട്ടത്തെ കാര്യമല്ലേ ഉള്ളൂ, അത്രോം സമയം ഞാന് വയര് ചൊട്ടിച്ചു പിടിച്ചോളാം...
സംവിധായകനു സന്തോഷമായി.
കര്ട്ടണ് പൊങ്ങി. കുരിശില് ചേര്ന്നു കിടക്കുന്ന നായകന് വയര് ഉള്ളിലേക്ക് വലിച്ചു.
ഠിം!
കുട്ടിത്തോര്ത്ത് ഉരിഞ്ഞ് താഴെ...

കാര്‍ന്നോന്മാര്‍ അവരുടെ തോര്‍ത്ത് മുണ്ട് കൊണ്ട് അമ്മച്ചിമാരുടെ കണ്ണു പൊത്തിയെന്നു ചരിത്രം.

(കടപ്പാട്: തോമസ് പാല. അദ്ദേഹത്തിന്റെ നാടകത്തെ സംബന്ധിച്ച ഹാസ്യ ലേഖനങ്ങളില്‍ നിന്ന്).

Dec 26, 2007

കുറേ പൂക്കള്‍...

കഴിഞ്ഞ വെക്കേഷന്‍ കാലത്ത് വീട്ടുമുറ്റത്ത് നിന്നും എടുത്ത കുറേ പടങ്ങള്‍.
കാമറ നേരേ പിടിക്കാന്‍ അറിയാത്തവന്റെ അതിമോഹമാണെന്ന് കരുതിയാല്‍ മതി.
ഇത് ഞാന്‍ അപ്പുമാഷ്‌ക്ക് സമര്‍പ്പിക്കുന്നു....
വന്‍‌പുലികളുടെ ഉപദേശങ്ങള്‍ക്ക് കാതോര്‍ക്കുന്നു.













Dec 25, 2007

ലബ്ബക്കഥകള്‍ 2

ആദ്യമായി ഒരു ട്രെയിന്‍ യാത്രക്ക് തയ്യാറെടുക്കുന്നു ലബ്ബ. കായംകുളത്തു നിന്നും കോട്ടയത്തേക്ക് ലോക്കല്‍ ട്രെയിനിലാണ് പോകേണ്ടത്. ലബ്ബ പ്ലാറ്റ്‌ഫോമില്‍ നില്‍ക്കുമ്പോള്‍ അന്നു കായംകുളത്ത് സ്റ്റോപ്പില്ലാത്ത മദ്രാസ് മെയില്‍ പാഞ്ഞു വന്നു. അത് കഴിഞ്ഞിട്ടാണ് ലോക്കല്‍ വണ്ടി. കഥയറിയാതെ ലബ്ബ ട്രെയ്‌നിനു കൈ കാണിച്ചു. വണ്ടിയുണ്ടോ നിര്‍ത്തുന്നു! സ്റ്റേഷനായതിനാല്‍ ഉച്ചത്തില്‍ സൈറനിട്ടു ട്രെയിന്‍ പാഞ്ഞു പോയി.

അരിശം കൊണ്ട് വിറച്ച ലബ്ബ പ്ലാറ്റ്‌ഫോമില്‍ ആഞ്ഞു ചവിട്ടി....

“കഴുവര്‍ഡ മോനേ, കൈ കാണിച്ചിട്ട് നിര്‍ത്തീമില്ല, കൂവിക്കളിയാക്കുന്നോ?!!!”

*********************************************************
ലബ്ബ നടന്നു വരുമ്പോള്‍ ഒരു സ്ത്രീ കവുങ്ങ് പിടിച്ച് കുലുക്കുന്നു. ലബ്ബയെ കണ്ട സ്ത്രീ ഒരു അടക്ക പറിച്ചു കൊടുക്കാന്‍ ലബ്ബയോട് പറഞ്ഞു. ഒരു കമ്പെടുത്ത് ലബ്ബ കുറേ എറിഞ്ഞു. അടക്ക വീണില്ല. വീണ്ടുമെറിഞ്ഞപ്പോ കമ്പ് അടക്കാമരത്തിന്റെ മണ്ടയില്‍ തങ്ങി. ഉടന്‍ ലബ്ബ കവുങ്ങില്‍ കയറി കമ്പെടുത്ത് താഴെ വന്ന് വീണ്ടും എറിഞ്ഞു തുടങ്ങി!
**********************************************************

ലബ്ബ പശുവിനെ വില്‍ക്കാന്‍ പോകുന്നു. വീട്ടില്‍ നിന്നിറങ്ങിയപ്പോള്‍ ഭാര്യയെ വിളിച്ചു.
“എടിയേ, നീ ഇതിനൊരു വെല പറയെടീ”
“എന്തിനാ?”
“പറയെടീ, ഒരു മൂവായിരം പറ”
“ഉം, മൂവായിരം”
“അള്ളാണെ, റസൂലിനാണേ മൂവായിരത്തിനു തരില്ല”

ലബ്ബ ചന്തയിലെത്തി.
“പശുവിനെ കൊടുക്കുന്നോ?” ഒരാള്‍ ചോദിച്ചു.
“എന്തു തരും?” ലബ്ബ.
“ഒരു രണ്ടായിരത്തഞ്ഞൂറു തരാം”
“അള്ളാണെ, റസൂലിനാണേ ഒരാള്‍ മൂവായിരം പറഞ്ഞിട്ട് കൊടുത്തില്ല, പിന്നാ രണ്ടായിരത്തഞ്ഞൂറു രൂഫ”.

നമ്മുടെ ലബ്ബ കള്ളയാണ ഇടില്ല.

Dec 24, 2007

ലബ്ബക്കഥകള്‍

2007 February 15 ന് അങ്ങനെ ഓരോന്നില്‍ പബ്ലിഷ് ചെയ്‌തത്...

മുല്ലാക്കഥകള്‍, സര്‍ദാര്‍ കഥകള്‍, സീതിഹാജിക്കഥകള്‍…കഥകള്‍ക്കെവിടെ പഞ്ഞം?
എന്നാല്‍ നമ്മുടെ നാട്ടില്‍ ലബ്ബക്കഥകള്‍ക്ക് വേണ്ടത്ര പ്രചാരം കിട്ടിയിട്ടില്ല.
എന്തുകൊണ്ടെന്നാല്‍ ഈ ലബ്ബക്കഥകള്‍ ഞങ്ങടെ കായംകുളം നാട്ടില്‍ വളരെ പ്രാദേശികമായി മാത്രം പ്രചരിച്ചിട്ടുള്ളതാകുന്നു.

നമ്മുടെ ലബ്ബ കായംകുളത്തു ജീവിച്ചിരുന്ന പൊതുകാര്യപ്രസക്തനായ ഒരു മാന്യദേഹമാകുന്നു. രാഷ്ട്രീയ, സാംസ്കാരിക മേഖലകളിലെ സജീവ സാന്നിധ്യമായിരുന്നു ടി ലബ്ബ അവര്‍കള്‍. കഥകളിലധികവും ആരോപിതമാണെന്നു വ്യംഗ്യം.

കഥകളുടെ കോപ്പിറൈറ്റവകാശോം ചോദിച്ചോണ്ട് അരും വന്നേക്കരുത്. എന്തുകൊണ്ടെന്നാല്‍ ഈ കഥകളില്‍ ചിലത് ഒന്നല്ലെങ്കില്‍ മറ്റൊരു കോലത്തില്‍ പാണന്‍ പാടിനടന്നതാവാം; നായക കഥാപാത്രത്തിന്റെ പേരില്‍ മാറ്റം വന്നിരിക്കാമെന്നേയുള്ളൂ.ഏതാനും കഥകള്‍ നിങ്ങളുടെ ആത്മശാന്തിക്കായി പറയുന്നുവെന്ന മഹാപാതകം
ഇതിനാല്‍ ചെയ്തു തുടങ്ങുന്നു….

1) ലബ്ബ ട്രാന്‍സ്പോര്‍ട്ട് ബസ്സില്‍ യാത്ര ചെയ്യുകയാണ്. കുറേ നേരം കഴിഞ്ഞപ്പോള്‍ ചെക്കിംഗ് ഇന്‍‌സ്പെക്റ്റര്‍ പരിശോധനക്കു വന്നു. ലബ്ബ നീട്ടിയ ടിക്കറ്റ് ഇന്‍‌സ്പെക്റ്റര്‍ പരിശോധിച്ചിട്ടു രണ്ടായി കീറി തിരികെ നല്‍കി. ഒരു നിമിഷം. ലബ്ബ ചാടിയെഴുന്നേറ്റ് ചെക്കിംഗ് ഇന്‍‌സ്പെക്റ്ററുടെ കരണക്കുറ്റിക്കിട്ടൊരൊറ്റയടി! ഠേ…
“ഹറാം പെറൊന്നേനെ, രണ്ടുരുവാ കൊടുത്തപ്പോള്‍ ആകെപ്പാടെ കിട്ടിയത് ഒരു കഷ്ണം കടലാസ്…നീ അതുംകൂടങ്ങു കീറിയോടാ..ഹിമാറേ”

ചെക്കിംഗ് ഇന്‍‌സ്പെക്റ്റര്‍ കേസു കൊടുത്തു. ലബ്ബ കോടതിയിലെത്തി;ആദ്യമായി. കേസു വിളിച്ചു. വക്കീല്‍ ലബ്ബയെ വിസ്തരിച്ചു. ലബ്ബ പറഞ്ഞു: “അധ്വാനിച്ചൊണ്ടാക്കിയ രണ്ടുരുവാ കൊടുത്തപ്പോള്‍ ആകെപ്പാടെ കിട്ടിയത് ഒരു കഷ്ണം കടലാസാണ് സാറേ, ഈ മരങ്ങോടന്‍ അതു മേടിച്ചങ്ങു കീറി സാറേ…ഞാന്‍ കയ്യുംകെട്ടി നോക്കിയിരിക്കണോ..ഒന്നങ്ങു കൊടുത്തു..പോക്രിത്തരമല്ലേ അവന്‍ കാണിച്ചത് സാറേ”

കോടതി ഇളകി.ചിരിയും ബഹളവും. ജഡ്‌ജ് ഹാമ്മറെടുത്ത് (കൊട്ടുവടീന്നു പറയും ഞങ്ങടെ നാട്ടില്‍) മേശമേല്‍ രണ്ടു മുട്ടു മുട്ടി. “സൈലന്‍സ്, സൈലന്‍സ്…”

ഉടന്‍ ജഡ്ജിയെ നോക്കി ലബ്ബ: “അല്ലാശാരീ, ആശാരി പറ .പോക്രിത്തരമല്ലേ അവന്‍ കാണിച്ചത്…..“

*********************

2) ലബ്ബയുടെ ഗ്രാമത്തില്‍ തീ പിടിച്ചു. കായംകുളം ഫയര്‍സ്റ്റേഷനിലെ നമ്പര്‍ ആര്‍ക്കുമറിയില്ല. ഉടന്‍ ലബ്ബയും കൂട്ടരും ഒരു കാറു പിടിച്ച് കായംകുളം ഫയര്‍സ്റ്റേഷന്റെ മുമ്പില്‍ വന്ന് ബോറ്ഡിലെ നമ്പരെഴുതിയെടുത്ത് തിരികെ ഗ്രാമത്തില്‍പ്പോയി ഫയര്‍സ്റ്റേഷനിലേക്ക് ഫോണ്‍ വിളിച്ചു.

********************

3) ലബ്ബയുടെ മകള്‍ക്ക് വരുന്ന വിവാഹാലോചനകളെല്ലാം മുടങ്ങുന്നു. ആലോചനകളെക്കുറിച്ച് ലബ്ബ നാട്ടുകാരോടെല്ലാം പറയുന്നതു കൊണ്ട് അസൂയാലുക്കളായ നാട്ടുകാരാണ് വിവാഹം മുടക്കുന്നതെന്നു ലബ്ബയുടെ ഭാര്യ.
പുതിയൊരാലോചന അന്വേഷിക്കാനിറങ്ങിയ ലബ്ബയോട് ‘ആരു ചോദിച്ചാലും എവിടെപ്പോകുന്നു എന്നു പറയരുത് ’എന്ന് ഭാര്യ ഉപദേശിച്ചു.

ലബ്ബ ബസ്സിലങ്ങനെയിരിക്കുകയാണ്. കണ്ടക്റ്റര്‍ വന്നു. “ങാ, എവിടേക്കാ….?”
“പ്‌ഭ! നായിന്റെ മോനേ, അതറിഞ്ഞിട്ടു വേണം നെനക്കെന്റെ മോടെ കല്യാണം മൊടക്കാന്‍ ഇല്യോടാ…..”

26 Comments »

മുല്ലാക്കഥകള്‍, സര്‍ദാര്‍ കഥകള്‍, സീതിഹാജിക്കഥകള്‍…കഥകള്‍ക്കെവിടെ പഞ്ഞം?
എന്നാല്‍ നമ്മുടെ നാട്ടില്‍ ലബ്ബക്കഥകള്‍ക്ക് വേണ്ടത്ര പ്രചാരണം കിട്ടിയിട്ടില്ല.
എന്തുകൊണ്ടെന്നാല്‍ ഈ ലബ്ബക്കഥകള്‍ ഞങ്ങടെ കായംകുളം നാട്ടില്‍ വള്രെ പ്രാദേശികമായി മാത്രം പ്രചരിച്ചിട്ടുള്ളതാകുന്നു.

Comment by സിയ — February 15, 2007 @ 11:37 am


സിയാ, ആദ്യത്തേത് ഒന്നൊന്നര, ആശാരീ എന്നുള്ള വിളിയില്‍ എന്റെ കണ്ട്രോള്‍ പോയി. ഇനിയും പോരട്ടെ കഥകള്‍.

Comment by ശ്രീജിത്ത് കെ — February 15, 2007 @ 11:41 am


മക്കളേ സിയാ,
ലബ്ബക്കഥകള്‍ ഉഷാറാണല്ലോ!
അലന്ന കഥകളെഴുതി ലബ്ബമാരുടെ പേരു കളയാതെ ആദ്യത്തേ കഥ പോലത്തെ കഥകള്‍ പെട്ടെന്നു പെട്ടെന്നെഴുതി പോസ്റ്റു ചെയ്യൂ.
(—-യാപ്പീസിലൂത്ത് വെച്ചിരിക്കുന്നത് പിന്നെ —-നാണോ.)ഹഹഹഹ

Comment by ikkaas@pikkaas — February 15, 2007 @ 11:48 am


ആദ്യത്തേത് സൂപ്പര്‍… ആശാരി പ്രയോഗം കലക്കന്‍. ഇനിയും വരട്ടേ

Comment by ഇത്തിരിവെട്ടം — February 15, 2007 @ 11:54 am


ഇക്കാസേ വില്ലൂസിന്റെ പേരുമാറ്റിയല്ലേ…

സിയ ഓഫിന് ഇന്ത്യന്‍ മാപ്പ്… പോരെങ്കില്‍ ഒരു വേള്‍ഡ് മാപ്പ്.

Comment by ഇത്തിരിവെട്ടം — February 15, 2007 @ 11:55 am


ഇദന്റെ ഫാവനേലെ കദയൊന്നുമല്ല ഇക്കാസേ, നാട്ടുകാര് പറയണ കഥ അങ്ങ് ക്വാട്ടീന്നേയുള്ളൂ…
കൂട്ടത്തില്‍ നല്ല കഥകള്‍ ഫില്‍റ്റര്‍ ചെയ്യാന്‍ ശ്രമിക്കാം…

Comment by സിയ — February 15, 2007 @ 11:57 am


“പ്‌ഭ! നായിന്റെ മോനേ, അതറിഞ്ഞിട്ടു വേണം നെനക്കെന്റെ മോടെ കല്യാണം മൊടക്കാന്‍ ഇല്യോടാ…..” - ഇത് കലക്കി സിയ

Comment by കുറുമാന്‍ — February 15, 2007 @ 11:59 am


ഈ ലബ്ബ തന്നെയാണോ,കോഫീ ഹൗസിലെ വൈയ്റ്ററോട്‌ “രാജാവേ ഒരു ചായവേണമായിരുന്നല്ലോ” എന്നു പറഞ്ഞത്‌?

Comment by പടിപ്പുര — February 15, 2007 @ 12:01 pm


അത് ഇ.ലബ്ബ അല്ല, കെ.പി.ലബ്ബ ആണ്.

Comment by സിയ — February 15, 2007 @ 12:05 pm


ഹോ.. ആശാരി പറ…

ചിരിച്ച് ഊപ്പാട് പോയി
സിയാ, തുടരൂ.. വേഗം ..

Comment by ഇടിവാള്‍ — February 15, 2007 @ 12:10 pm


പോരട്ടെ ലബ്ബാക്കാഥകളുടെ മാലപ്പടക്കങ്ങള്‍.

Comment by പൊതുവാളന്‍ — February 15, 2007 @ 12:22 pm


ഇത്‌ നമ്മടെ കൈപ്പള്ളി നിഷാദ്‌ ഹുസ്സൈന്‍ ലബ്ബയുടെ ആരെങ്കിലും ആണോ സിയേ? ( ഇന്ന് രണ്ടാമതും ഞാന്‍ ആമസോണ്‍ വനാനതരങ്ങളിലേക്ക്‌ പോവുന്നു).

ജോര്‍!!

Comment by കണ്ണൂസ്‌ — February 15, 2007 @ 12:22 pm


കൊള്ളാം സിയേ.. രസികന്‍!

Comment by ദില്‍ബാസുരന്‍ — February 15, 2007 @ 12:28 pm


ന്റെ കൈപ്പള്ളീ?
അമ്മച്യാണെ, ദേ എനിക്കൊരു മനസ്സറിവുമില്ല കേട്ടാ
എന്തര് ഇവരെക്കെക്കുഡെ പറയണത്?
ഡേയ്, ഗണ്ണൂസേ, അഡി!

Comment by സിയ — February 15, 2007 @ 12:31 pm


ഹ..ഹ..ഹ..കൊള്ളാട്ടോ സിയാ

Comment by sandoz — February 15, 2007 @ 12:34 pm


ലബ്ബക്കഥകളടിപൊളി
ഇനിയും പോരട്ടെ

Comment by സിജു — February 15, 2007 @ 12:40 pm


“പ്‌ഭ! നായിന്റെ മോനേ, അതറിഞ്ഞിട്ടു വേണം നെനക്കെന്റെ മോടെ കല്യാണം മൊടക്കാന്‍ ഇല്യോടാ…..”ഇതുഷാര്‍
അല്ല സിയ… ഇതുള്ളത് തന്നെയാണോ ?

Comment by വിചാരം — February 15, 2007 @ 1:22 pm


സിയ,
ലബ്ബാന്റെ കഥകളു കൊള്ളാം.
പ്രത്യേകിച്ച് ആശാരീന്റേത്.

Comment by സതീശ് മാക്കോത്ത് — February 15, 2007 @ 3:44 pm


ആ ആശാരി വിളിയാ കല്ക്കീത്.. ഹോ.. ചിരി നിര്‍ത്താന്‍ പെട്ട പാടേ..

കൃഷ് | krish

Comment by കൃഷ് | krish — February 15, 2007 @ 4:03 pm


ഹാഹാ..ലബ്ബക്കഥകള്‍ പോരട്ടെ.
സിയാ രസാവഹം.:))

Comment by വേണു — February 15, 2007 @ 4:34 pm


:)

Comment by ചക്കര — February 15, 2007 @ 5:32 pm


വളരെയധികം ചിരിച്ചു. ആശാരി പ്രയോഗം കിടിലന്‍

Comment by നദീം. — February 15, 2007 @ 8:02 pm


കൊട്ടുവടീം കൊണ്ടിരിക്കണ ആശാരി. ന്റമ്മോ കലക്കന്‍. കണ്ട്രോള്‍ വിട്ടു പോയി മാഷെ.
ഓ:ടോ. സീകോ ബില്‍ഡിങ്ങിന്റവിടെ വന്നാല്‍ ലബ്ബയെക്കാണാന്‍ പറ്റുമോ..;)

Comment by Nousher — February 15, 2007 @ 11:13 pm


നൌഷര്‍,
സീക്കോ ബില്‍ഡിംഗിന്റെ മുന്നില്‍ വന്ന് റ്റെലിമണി, മൊബൈലി ഭാഗത്തേക്ക് തിരിഞ്ഞു മനസ്സേകാഗ്രമാക്കി, കണ്ണടച്ച് മുന്നൂറു വട്ടം ഈ മന്ത്രം ഉരിയാടുക. : ലബ്ബശ്ശാസ്ത്രണാം ആശാരി തസ്‌മയ് കൊട്ടുവടിയാം ക്ലീം ഹ്രും ഭട്!
ലബ്ബ പ്രത്യക്ഷനാകും

Comment by സിയ — February 17, 2007 @ 4:55 am


ആദ്യത്തെ വരികളൊക്കെ കേട്ടുപരിചയമുണ്ടെന്നു തോന്നിയതോണ്ട്, ഒരു റെഡിമെയ്ഡ് സ്മൈലിയിട്ടു പോരാം എന്ന് കരുതിയതായിരുന്നു… പച്ചേങ്കി…

…അല്ലാശാരീ, ആശാരി പറ…

ഇവിടെയെത്തിയപ്പോള്‍ കണ്ട്രോള്‍ പോയെടാ… :)))

ശരിക്കും പോയി :))

പോരട്ടേ ഇമ്മാതിരി

Comment by അഗ്രജന്‍ — February 17, 2007 @ 6:26 am


“അല്ലാശാരീ, ആശാരി പറ .പോക്രിത്തരമല്ലേ അവന്‍ കാണിച്ചത്…..“
വയ്യേ, ചീരി നിര്‍ത്താന്‍ വയ്യേ, എന്റെ വയറ്‌ ഉളുക്കിയേ

Comment by anzar — February 17, 2007 @ 10:47 am

Dec 20, 2007

ഒരു വര്‍ഷം തികയുമ്പോള്‍...

പ്രിയപ്പെട്ടവരേ,

ഞാന്‍ ബ്ലോഗിലെത്തിയിട്ട് ഒരു വര്‍ഷം കഴിയുന്നു...
വളരെ യാദൃശ്‌ചികമായിട്ടാണ് ബ്ലോഗിനെ കുറിച്ച് അറിഞ്ഞത്. ആദ്യം ബ്ലോഗ് വായനയായിരുന്നു.
കഴിഞ്ഞ ഡിസംബറിലാണ് ആദ്യമായി ഒരു പോസ്റ്റിടുന്നത്.

ഗ്രാഫിക് ഡിസൈനിംഗ് പഠിക്കാം എന്നൊരു ബ്ലോഗുമായി തുടങ്ങി. വായനക്കാരുടെ അകമഴിഞ്ഞ പ്രോത്സാഹനം ആ സംരംഭത്തിനു ലഭ്യമായി. നന്ദിയുണ്ട് എല്ലാവരോടും.

പിന്നെ വേറെയും മൂന്നു ബ്ലോഗുകള്‍. അങ്ങനെ ഓരോന്ന്, ചിന്താവിഷ്‌ടനായ സിയ, പടമിടം.

പല ബ്ലോഗുകളിലായി, പല വിഷയങ്ങളിലായി ചിതറിക്കിടക്കുന്ന ബ്ലോഗ് പോസ്റ്റുകള്‍ എല്ലാം ഒറ്റ ബ്ലോഗിലാക്കിയാലെന്താ എന്ന ചിന്തയാണ് ഇങ്ങനെയൊരു ബ്ലോഗ് രൂപപെടുത്തുന്നതിലേക്ക് നയിച്ചത്.

ഇതിനു വേണ്ട സാങ്കേതിക സഹായങ്ങളും ഉപദേശവും നല്‍‌കിയ കുട്ടന്‍‌മേനോന്‍, ലോനപ്പന്‍ എന്ന ദേവദാസ്, ഹരീ, കെ.ശ്രീജിത്ത്, ഇക്കാസ് എന്നിവരോടും അഭിപ്രായങ്ങളും നിര്‍ദ്ദേശങ്ങളും അറിയിച്ച ചന്ദ്രശേഖരന്‍ നായര്‍, വില്ലൂസ്, കുറുമാന്‍, അഗ്രജന്‍, അതുല്യാമ്മ, ഉമേച്ചി, ദില്‍‌ബാസുരന്‍, ഇത്തിരിവെട്ടം, സുല്‍, അന്‍ഷാദ് മുഹമ്മദ് എന്നിവരോടും ഹൃദയപൂര്‍വ്വം നന്ദി പറയുന്നു.

ബ്ലോഗിംഗിന്റെ ആദ്യകാലത്ത് ശിശുസഹജമായ ചാപല്യങ്ങള്‍ സംഭവിച്ചിട്ടുണ്ട് എന്നു സമ്മതിക്കാന്‍ എനിക്ക് മടിയില്ല. എന്നാല്‍ ക്രമേണ പാകത കൈവരിക്കാന്‍ ഞാന്‍ ശ്രമിക്കുകയായിരുന്നു. എഴുത്തിലും വായനയിലും ബോധപൂര്‍വ്വമായ ഒരു തെരഞ്ഞെടുക്കല്‍ കൈക്കൊള്ളുന്ന നിലയിലാണ് ഇന്ന്.

പ്രസക്തമെന്നു തോന്നുന്ന പഴയ പോസ്‌റ്റുകള്‍ ഈ ബ്ലോഗില്‍ വീണ്ടു പബ്ലിഷ് ചെയ്‌ത് ഒരു റെഫറന്‍സിനായി സൂക്ഷിക്കണം എന്നു വിചാരിക്കുന്നു. പഴയ ബ്ലോഗുകള്‍ നിലനിര്‍ത്തുകയും ചെയ്യുന്നു.

സത്യത്തില്‍ ഒരു കൊല്ലം മാത്രമേ ആയുള്ളൂ ഞാന്‍ ഇവിടെ എന്നോര്‍ത്ത് എനിക്ക് തന്നെ അത്ഭുതമാകുന്നു. കാരണം ബ്ലോഗ് നിമിത്തമായി എനിക്ക് ലഭ്യമായ ചില സൌഹൃദങ്ങള്‍ക്ക്, ആത്മബന്ധങ്ങള്‍ക്ക് യുഗങ്ങളുടെ പഴക്കമുണ്ടെന്ന് തന്നെ എനിക്കു തോന്നുന്നു.

ഒരിക്കല്‍കൂടി എല്ലാവര്‍ക്കും നന്ദി...