Feb 15, 2012

ഫോട്ടോഷോപ്പ് : ബ്യൂട്ടി റീ ടച്ച്.

 ഫാഷന്‍ മോഡലുകളുടെയും കവര്‍‌ഗേള്‍സിന്റെയുമൊക്കെ ചര്‍മ്മ കാന്തി കൊതിക്കാത്ത പെണ്ണുങ്ങളോ അവരുടെ സുന്ദരമേനികള്‍ ഉറക്കം കെടുത്താത്ത ആണുങ്ങളോ വിരളം തന്നെ :)
പ്രായം കണ്ടാല്‍ ചര്‍മ്മം തോന്നാത്ത വിധത്തില്‍ എന്തോരം അഴകുവഴിയുന്ന സുന്ദരസ്നിഗ്ദ്ധമോഹനവശ്യമേനികള്‍! ഇത്തരം ഫോട്ടോകളില്‍ ഭൂരിഭാഗവും റിയലിസ്റ്റിക് ആയ ഒരു രീതിയിലല്ല പണിഞ്ഞെടുക്കുന്നത് എന്നത് പലര്‍ക്കും അറിയാമായിരിക്കും. എന്നു വെച്ചാല്‍ ഫോട്ടോഗ്രാഫേഴ്‌സ് വിശ്വസിക്കാവുന്ന തരത്തിലുള്ള, അസാധ്യമായ ഒരു കൃത്രിമ ചര്‍മ്മം സൃഷ്‌ടിച്ചെടുക്കുകയാണ് ചെയ്യുന്നതത്രെ. കുറ്റമറ്റ ചര്‍മ്മം വേണം താനും അതേ സമയം അതൊരു പ്ലാസ്റ്റിക് ചര്‍മ്മം ആയിരിക്കുകയും അരുത്. അവിടെയാണ് ചാലഞ്ച്. കാക്കപ്പുള്ളിയും ചുണങ്ങും ചൊറിയും മറുകും മുഖക്കുരുവും ചുളിവുമില്ലാത്ത സുന്ദര കൃത്രിമമോന്ത...അത്താണ് :)

ഒരു ഫോട്ടോയില്‍ വളരെ വേഗം നിന്ന് ചുളിവുകളും പുള്ളികളും പാടുകളുമൊക്കെ മാറ്റി സുന്ദരമാക്കുന്നത് എങ്ങനെയെന്ന് നമുക്ക് നോക്കാം...?

ഈ പാഠത്തില്‍ നാം ലേയര്‍ മാസ്‌കും (Layer Mask) ക്ലിപ്പിംഗ് മാസ്‌കും (Clipping Mask) ചില ഫില്‍ട്ടറുകളും ഉപയോഗിക്കുന്നു.

ലേയര്‍ മാസ്‌കിനെക്കുറിച്ച് വിശദമായി ഇവിടെയുണ്ട്. അറിയാന്‍ പാടില്ലാത്തവര്‍ അതൊന്ന് നോക്കണമെന്ന് തെര്യെപ്പെടുത്തിക്കൊള്ളുന്നു. കൂടാതെ ഫോട്ടോഷോപ്പ് ലേയറുകളെക്കുറിച്ച് അടിസ്ഥാന ധാരണ വേണ്ടവര്‍ ഈ പോസ്റ്റ് കൂടി വായിച്ച് ഈ ട്യൂട്ടോറിയല്‍ വായിക്കുന്നതായിരിക്കും ഉത്തമം.

ഈ മാസ്‌കുകള്‍ ഇച്ചിരി തൊന്തരവ് പിടിച്ചതാണെന്ന് വിചാരിച്ച് ചിലര്‍ വിട്ടുകളയുന്ന ഒരു സംഗതിയാണ്. പക്ഷേ മനസ്സിലാക്കിയാല്‍ പിന്നെ ഭയങ്കര എളുപ്പമാണ്. ഓരോ ജോലി വേഗത്തില്‍ ചെയ്യാന്‍ മാസ്കുകളോളം നല്ല കാര്യം വേറെയില്ല. Non destructive Editing എന്ന വിഭാഗത്തില്‍ വരുന്നതാണ് മാസ്‌കുകള്‍. അതായത് ഇമേജിന് കേടുപാട് വരുത്താതെ മാറ്റങ്ങള്‍ വരുത്തുക എന്നത്.

ഈ മാസ്കെന്ന് പറയുന്നത് അടിസ്ഥാനപരമായി പിക്സലുകളുടെ കൂട്ടത്തെ നിയന്ത്രിക്കാനുള്ള ഒരു കുന്ത്രാണ്ടമാണ്. ഫ്രാങ്ക്‍ലി സ്പീക്കിംഗ്, ഒരു ലേയറില്‍ അടങ്ങിയിട്ടുള്ള പി‌ക്സലിന്റെ ട്രാന്‍സ്‌പെരന്‍സി, ഒപാസിറ്റി ഒക്കെ നിയന്ത്രിക്കുന്നൂന്ന്. യദായാദഹി മാസ്‌കസ്യ ഗ്ലാനിര്‍ഭവതി പിക്‍സലഃ എന്നാണ് സീതാരാമന്‍ നാരായണന്‍ പറഞ്ഞത്. അതായത് എവിടെയൊക്കെ മാസ്‌ക് ആക്റ്റീവാകുന്നോ അവിടെ പിക്‍സലിന് ഗ്ലാനി വരുന്നു അഥവാ അവിടം ട്രാന്‍‌സ്‌പെരന്റ് ആയി മാറും. എവിടെയൊക്കെ മാസ്‌ക് ഇനാക്റ്റീവ് ആണോ അവിടെ പിക്സല്‍ തികച്ചും വെളിവായിടും. ഒരു മാസ്ക്ക് ആക്റ്റീവായും ഇനാക്റ്റീവായും ഉപയോഗിച്ച് പിക്സലുകള്‍ കാണപ്പെടുന്നതിനെ കണ്ട്രോള്‍ ചെയ്യാമെന്ന് സാരം.

ക്ലിപ്പിംഗ് മാസ്‌ക്.
ക്ലിപ്പിംഗ് മാസ്‌കെന്ന് പറയുന്നത് സാധാരണ ലേയര്‍ മാസ്‌കില്‍ നിന്ന് വ്യത്യസ്ഥമായി ഒന്നിലധികം ലേയറുകളില്‍ ഒരേ സമയം പ്രയോഗിക്കാവുന്ന ഒരുതരം മാസ്‌ക് ആണ്. ഒരുപാട് സംഗതികള്‍ ഒരേ സമയം ക്ലിപ്പിംഗ് മാസ്‌കില്‍ ചെയ്യാനാവും. ഒരു ലേയറില്‍ ലേയര്‍ മാസ്‌ക് ആക്റ്റീവായിരിക്കുമ്പോള്‍ തന്നെ മറ്റൊരു ലേയറായി അതിന് മുകളില്‍ ആഡ് ചെയ്ത് ഒരു പാട് മോഡിഫിക്കേഷനുകള്‍ താഴത്തെ ലേയറില്‍ ചെയ്യാന്‍ അനുവദിക്കുന്ന മാസ്‌കാണ് ക്ലിപ്പിംഗ് മാസ്‌ക്. ഇങ്ങനെ നീട്ടിപ്പരത്തി വിശദീകരിക്കുന്നത് കൊണ്ട് കാര്യമില്ല. താഴെ ഉദാഹരണങ്ങള്‍ ശ്രദ്ധിക്കുക.

ഇവിടെ ഒരു ഇമേജ്, ബാക്‍ഗ്രൌണ്ട് ലേയര്‍ മാ‌സ്ക് ഉപയോഗിച്ച് മാസ്‌ക് ചെയ്യപ്പെട്ടിരിക്കുന്നതാണ്.
 ചിത്രം 1.1
ചിത്രം 1.2

(ചിത്രം 1.1, ചിത്രം 1-2). ഈ ഇമേജിനെ ഒരു വെക്റ്റര്‍ ഫ്രെയിമിലേക്ക് (ചിത്രം 1.3) കൃത്യമായി ഒതുക്കണം. ഫോട്ടോഷോപ്പില്‍ ഏറ്റവും ഈസിയായ മാര്‍ഗ്ഗം ക്ലിപ്പിംഗ് മാസ്‌ക് ഉണ്ടാക്കുക എന്നതാണ്
 ചിത്രം 1.3

ആദ്യം വെക്റ്റര്‍ ഇമേജിനെ (ചിത്രം 1.3) ഫോട്ടോഷോപ്പില്‍ തുറക്കുക. ഇനി ചിത്രം 1.2 നെ ആ ഡോകുമെന്റിലേക്ക് കോപി പേസ്റ്റ് ചെയ്യുക. ഇത് ചിത്രം1.3 ന്റെ തൊട്ടു മുകളിലായിരിക്കണം. ഇനി ക്ലിപ്പിംഗ് മാസ്ക് ചെയ്യാം. അതിനായി ഒരുപാട് മാര്‍ഗ്ഗങ്ങളുണ്ട്. ക്ലിപ്പിംഗ് മാസ് വേണ്ട ലേയറില്‍ റൈറ്റ് ക്ലിക്ക് ചെയ്ത് Create Click മാസ്ക് പറയാം. അല്ലെങ്കില്‍ Alt കീ അമര്‍ത്തിക്കൊണ്ട് ലേയര്‍ പാലറ്റില്‍ രണ്ട് ലേയറിന്റെയും മധ്യത്തിലായി ക്ലിക്ക് ചെയ്യുക. കര്‍സര്‍ മധ്യത്തിലേക്ക് വരുമ്പോള്‍ ചിത്രം 1.4 ലെപ്പോലെ ഒരു അടയാളം കാണാം. ചുവന്ന ബോക്സ് നോക്കുക.  
ചിത്രം 1.4

അന്നേരമേ ക്ലിക്ക് ചെയ്യാവൂ. ചിത്രം 1.5 നോക്കുക. ക്ലിപ്പിംഗ് മാസ്‌ക് ചെയ്യപ്പെട്ടിരിക്കുന്നു
ചിത്രം 1.5
ഒന്നുകില്‍ ഈ ക്ലിപ്പിംഗ് മാസ്‌ക് ലേയറോ അല്ലെങ്കില്‍ അതിനടിയിലെ ഇമേജ് ലേയറോ മൂവ് ചെയ്യിച്ച് ഇഷ്ടപ്പെട്ട രീതിയില്‍ ഇമേജിനെ ഫ്രെയിമില്‍ ഒതുക്കാവുന്നതാണ്.

ലേയര്‍ മാസ്‌ക് ഒരു ഗ്രേസ്കെയില്‍ ഇമേജാണെന്ന് നാം വായിച്ചു. ലേയര്‍ മാസ്കിലെ കളര്‍ വേരിയേഷന്‍ അനുസരിച്ച് മാസ്ക്‍ ചെയ്യപ്പെട്ടിട്ടുള്ള ലേയറിന്റെ ട്രാന്‍‌പെരന്‍സിക്ക് മാറ്റം വരും. അതേസമയം ക്ലിപ്പിംഗ് മാസ്‌ക് അത് അപ്ലൈ ചെയ്യപ്പെട്ടിട്ടുള്ള മുഴുവന്‍ ലേയറുകളുടെ (ബേസ് ലേയര്‍ അഥവാ അണ്ടര്‍ലെയിംഗ് ലേയറുകളുടെ) ട്രാന്‍സ്‌പെരന്‍സി വാല്യു അനുസരിച്ച് നിലകൊള്ളുന്നതാണ്. അതായത് ബേസ് ലേയറുകളുടെ ട്രാന്‍സ്‌പെരന്‍സി വാല്യു അനുസരിച്ച് ക്ലിപ്പിംഗ് മാസ്‌കിലെ ട്രാന്‍‌സ്‌പെരന്‍സിക്ക് മാറ്റം വരുന്നു. ഉദാഹരണമായി ചിത്രം 1.3 വെക്റ്റര്‍ ഷേപ്പിന്റെ ഒപാസിറ്റി കുറച്ചാല്‍ ചിത്രം 1.5 ന്റെ ഒപാസിറ്റിയും മാറുന്നു.

ഇനി ശ്രദ്ധിക്കേണ്ടതായ കാര്യം ഒരു പുതിയ ലേയര്‍ ഉണ്ടാക്കുമ്പോള്‍ ആ ലേയറിനെ തൊട്ടു താഴെയുള്ള ലേയറുമായി ക്ലിപ്പിംഗ് മാസ്ക് ചെയ്യുന്നതിനായി, അതായത് ഒരു പുതിയ ക്ലിപ്പിംഗ് മാസ്ക് ലേയര്‍ ഉണ്ടാക്കുന്നതിനായി ലേയര്‍ ഉണ്ടക്കുമ്പോള്‍ (Layer>New Layer അല്ലെങ്കില്‍ പാലറ്റില്‍ ന്യൂ ലേയര്‍ ഐക്കണില്‍ Alt+Click) വരുന്ന ഡയലോഗ് ബോക്സില്‍ Use Previous Layer to Create Clipping Mask എന്ന ഓപ്ഷന്‍ ചെക്ക് ചെയ്താല്‍ മതി. (ചിത്രം 1.6)  
ചിത്രം 1.6
അതിന്റെ ബ്ലെന്‍ഡിംഗ് മോഡ് മാറ്റുകയും ചെയ്യാം. അപ്പോഴതിനെ Soft Light Layer, Overlay Layer എന്നൊക്കെ നമുക്ക് വിളിക്കാം. (ചിത്രം 1.7). ഈ ട്യൂട്ടോറിയലില്‍ നാമത് ചെയ്യുന്നുണ്ട്.
ചിത്രം 1.7


ബോറടിച്ചോ? ഇനി നമുക്ക് പണിയിലേക്ക് കടക്കാം.
സുന്ദരിയായ ഹേമമാലിനിച്ചേച്ചിയെ ഒരു പബ്ലിക് ഫിഗര്‍ എന്ന നിലയില്‍ നമുക്ക് ഇതിലേക്ക് പരിഗണിക്കാം :)
  1. ചേച്ചീന്റെ പടം (ചിത്രം 2.1) ഫോട്ടോഷോപ്പില്‍ തുറക്കുക.

    ചിത്രം2.1
  1. ബാക്ക്ഗ്രൌണ്ട് ലേയറിനെ ഡൂപ്ലിക്കേറ്റ് ചെയ്യുക. (Ctrl+J). ഈ ലേയറിനെ Surface Blur എന്ന് റീനേം ചെയ്യുക. റീനേം ചെയ്യുന്നതിന് ലേയര്‍ പാലറ്റില്‍ ലേയറില്‍ ഡബിള്‍ക്ലിക്ക് ചെയ്യുക. (ചിത്രം 2.2)
     ചിത്രം2.2
  2. Surface Blur എന്ന ലേയറില്‍ Surface Blur ഫില്‍ട്ടര്‍ കൊടുക്കുക. Filter > Blur > Surface Blur. 
     ചിത്രം2.3
    Radius, Threshold വാല്യുകള്‍ ഇമേജിന്റെ റെസലൂഷന്‍ അനുസരിച്ച് കൊടുക്കുക. ചിത്രം 2.3.
    റിസല്‍റ്റ് ഏകദേശം ഇങ്ങനെ ആയിരിക്കണം. ചിത്രം 2.4.
    ചിത്രം 2.4.
  1. ഇനി Surface Blur ലേയറിനെ Hide All ലേയര്‍ മാസ്‌ക് ചെയ്യുക. Alt പ്രെസ്സ് ചെയ്ത് കൊണ്ട് ലേയര്‍ പാലറ്റില്‍ ലേയര്‍ മാസ്‌ക് ഐക്കണില്‍ ക്ലിക്ക് ചെയ്യുക. ചിത്രം 2.5.
     ചിത്രം 2.5.


  2. ഇനി മാസ്ക് സെലക്റ്റ് ചെയ്ത ശേഷം ഒരു സോഫ്റ്റ് ബ്രഷ് കൊണ്ട് പടത്തിന്റെ സ്മൂത്ത് ചെയ്യേണ്ട ഭാഗങ്ങളില്‍ ഉരക്കുക. വൈറ്റ് ആയിരിക്കണം ബ്രഷ് ചെയ്യേണ്ട കളര്‍. കണ്ണിനെയും പല്ലിനെയും ചുണ്ടിനെയുമൊക്കെ വെറുതേ വിടുക. ചിത്രം 2.6.
      ചിത്രം 2.6.
  3. ഉരപ്പ് കഴിഞ്ഞ പടം. ചിത്രം 2.7. ശ്രദ്ധിച്ച് പെയിന്റെ ചെയ്യണം. ഞാന്‍ സ്പീഡീല്‍ ചെയ്തെന്നേ ഉള്ളൂ
     ചിത്രം 2.7. 
    ബാക്ക്ഗ്രൌണ്ട് ലേയര്‍ ഓഫ് ചെയ്താല്‍ മാസ്‌ക് ഇങ്ങനെയിരിക്കും. ചിത്രം 2.8.
     ചിത്രം 2.8.

  4. ഇനി ന്യൂ ലേയര്‍ ഐക്കണില്‍ Alt+Click ചെയ്ത് ഡയലോഗ് ബോക്സില്‍ Use Previous Layer to Create Clipping Mask എന്ന ഓപ്ഷന്‍ ചെക്ക് ചെയ്ത് ഒരു ക്ലിപ്പിംഗ് മാസ്‌ക് ഉണ്ടാക്കുക. ഈ ക്ലിപ്പിംഗ് മാസ്‌ക് ലേയറിനെ Paint Smoothing എന്ന് പേരുമാറ്റുക. ചിത്രം 2.9.
    ചിത്രം 2.9.


  5. ഒരു വലിയ സോഫ്‌റ്റ് ബ്രഷ് എടുത്ത്, ഐ ഡ്രോപ്പര്‍ ടൂള്‍ കൊണ്ട് (I) ചിത്രത്തില്‍ നിന്ന് ഏതെങ്കിലും ഒരു കളര്‍ സെലക്റ്റ് ചെയ്ത് വളരെ ചെറിയ ഒപാസിറ്റിയില്‍ (10%) പെയിന്റ് ചെയ്യുക. Paint Smoothing ക്ലിപ്പിംഗ് മാസ്‌ക് ലേയര്‍ ആയിരിക്കണം സെലക്റ്റ് ചെയ്യേണ്ടത്. കളര്‍ ടോണുകള്‍ കിട്ടാനാണിത്. ഈ ഘട്ടത്തില്‍ Surface Blur ലേയറിന്റെ ഒപാസിറ്റി ഒരു 70% ആയി കുറച്ച് നോക്കുക. ചിത്രം 2.10.
    ചിത്രം 2.10.
  6. ഇനി ഒരു Soft Light ലേയര്‍ ഉണ്ടാക്കുക. ന്യൂ ലേയര്‍ ഐക്കണില്‍ Alt+Click ഡയലോഗ് ബോക്സില്‍ Use Previous Layer to Create Clipping Mask എന്ന ഓപ്ഷന്‍ ചെക്ക് ചെയ്യുന്നതിനൊപ്പം Mode സോഫ്‌റ്റ് ലൈറ്റ് ആക്കുക. Fill with Soft-Light-neutral Color (50% gray) എന്ന ഓപ്ഷന്‍ ചെക്ക് ചെയ്യാന്‍ മറക്കരുത്. ചിത്രം 2.11.
    ചിത്രം 2.11.
    Dodge Tool ഉപയോഗിക്കുന്നതിന് വേണ്ടിയാണ് ഈ ക്ലിപ്പിംഗ് മാസ്‌ക്. അതിനാല്‍ ലേയറിന്റെ പേര് Dodging എന്ന് കൊടുക്കുക.

  7. Dodge Tool (O) കൊണ്ട് Dodging ലേയറില്‍ ഉരച്ച് ചുളിവുകള്‍ കളയാം, കാക്കപ്പുള്ളികളും.

  8. ഇതൊക്കെ ചെയ്താലും മുഖം ഒരു മാതിരി പ്ലാസ്റ്റിക് പോലെ പോളിഷ്‌ഡ് ആയി ഇരിക്കും. സ്വാഭാവികത വേണ്ടേ. അതിനായി ഒരു Overlay layer ഉണ്ടാക്കുക. സേം സ്റ്റെപ്. ന്യൂ ലേയര്‍ ഐക്കണില്‍ Alt+Click ഡയലോഗ് ബോക്സില്‍ Use Previous Layer to Create Clipping Mask എന്ന ഓപ്ഷന്‍ ചെക്ക് ചെയ്യുന്നതിനൊപ്പം Mode ഓവര്‍ലേ ആക്കുക. Fill with Overlay-neutral Color (50% gray) എന്ന ഓപ്ഷന്‍ ചെക്ക് ചെയ്യാന്‍ മറക്കരുത്. Surface Blur ലേയറിന്റെ ഒപാസിറ്റി ഒരു 100% ശതമാനം ആക്കി വെക്കുക. ഇതില്‍ നമ്മള്‍ ഒരു Texture കൊടുക്കുകയാണ്. ലേയറിന്റെ പേര് Texture എന്നാക്കുക.
  9. ഇനി Filter > Noise > Add Noiseഎന്ന ഫില്‍ട്ടര്‍ കൊടുത്ത് കുറച്ച് വേണ്ടത്ര Noise ആഡ് ചെയ്യുക. Uniform, Monochromatic എന്നീ ബോക്സുകള്‍ ചെക്ക് ചെയ്യുക. ചിത്രം 2.12. റെസലൂഷന്‍ അനുസരിച്ചാണ് നോയിസ് വാല്യൂ കൊടുക്കേണ്ടത്
    ചിത്രം 2.12.
  10. texture വളരെ ഷാര്‍പ്പാണ്. അല്പം ബ്ലര്‍ കൊടുക്കാം. Filter > Blur >Gaussian Blur. ചിത്രം 2.13.

  11. ഒരു ഫില്‍ട്ടര്‍ കൂടി. Filter > Stylize >Emboss.  
    ഇപ്പോഴുമൊരു ഫേക് ലുക്ക് ഉണ്ട്. Emboss ബ്ലര്‍ കൊടുത്ത ഉടനേ മറ്റൊന്നും ചെയ്യാതെ Edit>Fade Emboss> ഒപാസിറ്റി 40 കൊടുക്കുക. ഇനി Surface Blur ലേയറിന്റെ ഒപാസിറ്റി ഒരു 70% ആയി കുറക്കുക.
  12. സംഗതി കഴിഞ്ഞു. ഇനി ചേച്ചീനെ ഇച്ചിരീം കൂടി സുന്ദരി ആക്കാം Background ലേയര്‍ സെലക്റ്റ് ചെയ്ത് കണ്ണീനകംഅല്പം ബ്രൈറ്റ് ആക്കുക. Dodge Tool മതി. പല്ല് വെളുപ്പിച്ചു. കണ്‍‌പീലികള്‍ Burn Tool (O) കൊണ്ട് ഒന്ന് കറുപ്പിച്ചു. പുരികവും. അതു കൊണ്ട് തന്നെ ചുണ്ടൊക്കെ ഒന്ന് നന്നാക്കി ഞാന്‍ :) മതി.


ട്യൂട്ടോറിയലിന് വേണ്ടി വേഗത്തില്‍ ചെയ്തതിനാല്‍ ഡീറ്റയില്‍‌സില്‍ അത്ര ശ്രദ്ധിക്കാന്‍ കഴിഞ്ഞില്ല എന്ന മുന്‍‌കൂര്‍ ജാമ്യം ഉണ്ട് :)

Dec 28, 2011

റോമിംഗ് ഗിരി സ്പീക്കിംഗ്

“ഞാന്‍ കറ്റാനം ഗിരീഷ്... റോമിംഗില്‍ ഗിരി എന്നാണ് ഞാനറിയപ്പെടുന്നത്...”

കറ്റാനം ഗിരീഷ് സ്വയം പരിചയപ്പെടുത്തുന്നത് ഇങ്ങനെയാണ്. “ഈവനിംഗ് ന്യൂസ്” സായാഹ്ന ദിനപ്പത്രത്തിന്റെ ചീഫ് എഡിറ്റര്‍ കം മൊതലാളി. പരമ സാധു, പരോപകാരി. പ്രത്യുപകാരങ്ങള്‍ ഏറ്റുവാങ്ങി ഏറ്റുവാങ്ങി ഗിരി ഇപ്പോള്‍ ഒന്നരക്കാലിലാണ് നടപ്പ്. ഇപ്പോഴത്തെ മന്ത്രി ശ്രീ കൊട്ടാരക്കര ഗണേഷ് കുമാറിനെതിരേ മുമ്പ് പത്രത്തില്‍ സത്യസന്ധമായി എന്തോ ഒന്നെഴുതിയതിന് ആ ജൂനിയര്‍ മാടമ്പിയുടെ ഗുണ്ടകള്‍ തല്ലിയൊടിച്ചതാണ് കാലെന്നും സംസാരമുണ്ട്.

പത്രവ്യവസായത്തിനു പുറമേ വണ്ടിക്കച്ചവടം, റെന്റ് എ കാര്‍, റിയല്‍ എസ്റ്റേറ്റ്, കൊട്ടേഷന്‍ വര്‍ക്കുകള്‍ തുടങ്ങി ഗിരി കൈ വെക്കാത്ത ബിസിനസുകളില്ല. ഇദ്ദേഹം ഇടപെടാത്ത പ്രശ്‌നങ്ങളില്ല, ഏറ്റെടുക്കാത്ത തര്‍ക്കങ്ങളില്ല, ആ തലയിലുദിക്കാത്ത ഐഡിയകളില്ല.

റെന്റിന് കൊടുക്കാനായി കാറുകള്‍ വാങ്ങും. രെജിസ്ട്രേഷനെടുക്കാന്‍ വണ്ടിയൊന്നിനു ഇരുപത്തയ്യായിരത്തില്‍ പരം രൂപ സര്‍ക്കാരിന് ഫീസ് കൊടുക്കണം. 4x25=ഒരു ലക്ഷം. ഇമ്മിണി പുളിക്കും. നാലു കാറ് വാങ്ങിയാല്‍ അതിലൊന്നിനു മാത്രമേ ഗിരി രെജിസ്ട്രേഷനെടുക്കൂ. ആ കിട്ടുന്ന രെജിസ്ട്രേഷന്‍ നമ്പര്‍ ഉപയോഗിച്ച് നാലു കാറിനും ഒരേ നമ്പര്‍ പ്ലേറ്റുണ്ടാക്കി ഘടിപ്പിച്ച് വാടകക്ക് കൊടുക്കും. ഒരേ നമ്പറില്‍ നാലുകാര്‍! വണ്ടികള്‍ മൂന്നാലു മാസം ഓടിക്കിട്ടുന്ന പൈസ കൊടുത്ത് പിന്നീട് ബാക്കി മൂന്ന് കാറിന് രെജിഷ്ട്രേഷനെടുക്കും. ഇങ്ങനെയൊക്കെയാണ് ഗിരിയുടെ മറിപ്പുകള്‍.

ഭയങ്കരമായ ഗുണ്ടാസാമ്രാജ്യത്തിന്നധിപനായവന്‍ ഞാനേ എന്നാണ് ഭാവം. ദാവൂദും ഛോട്ടാരാജനുമൊക്കെ എന്റെ വിനീത ശിഷ്യന്മാര്‍ എന്നേ വിനയപൂര്‍വ്വം ഗിരി മൊഴിയുകയുള്ളൂ. ഗുണ്ടകളുടെ എണ്ണം കൂട്ടുന്നതിന്റെ സാമ്പിളൊരെണ്ണം പറയാം.

ഒരിക്കല്‍ കാറു വില്‍പ്പനയുടെ കാര്യം സംസാരിക്കാനായി മാരുതി സുസുക്കിയുടെ റെപ്രസേന്റേറ്റീവുകളായ കായംകുളത്തുള്ള രണ്ട് പയ്യന്മാര്‍ ഗിരിയുടെ വീട്ടിലെത്തുന്നു. മുണ്ടക്കല്‍ ശേഖരന്‍ കയറി മേഞ്ഞ മംഗലശ്ശേരി നീലകണ്ഠനെപ്പോലെ ഗിരി വേച്ച് വേച്ച് വന്നിട്ട് അവരോട് ഉമ്മറത്തേക്ക് കേറിയിരിക്കാന്‍ പറയുന്നു.
വന്നവര്‍ പരിയപ്പെടുത്തി: “ഞങ്ങള്‍ ഇന്‍ഡസ് മോട്ടോഴ്‌സില്‍ നിന്നാണ്. ഞാന്‍ ഷാ, ഇത് അനൂപ്...”
അപ്പോഴേക്കും ഗിരിക്ക് ഒരു ഫോണ്‍ കോള്‍.
“അതേ ഗിരിയാണ്...ങേ...കായംകുളത്തോ? ഒന്നും പേടിക്കണ്ട. നമ്മടെ പയ്യന്മാര്‍ അവിടെയുണ്ട്. ഒരു പ്രശ്‌നോമുണ്ടാകില്ല. അതേന്ന്...കേട്ടിട്ടില്ലേ കായംകുളം ഷാ, അനൂപ്...ആ പിന്നേ... അവന്മാരുടെ പേര് കേട്ടാല്‍ ലവര് വെറയ്‌ക്കും. ദാണ്ടെ രണ്ട് പേരും എന്റെ മുന്നിലിരിപ്പുണ്ട്. നിങ്ങള്‍ ധൈര്യമായിരിക്ക്. അവരെ ഞാന്‍
പറഞ്ഞേല്‍പ്പിച്ചോളാം...” ഇതാണ് ഗിരിയുടെ നടപ്പ് രീതികള്‍.

അങ്ങനെയിരിക്കെയാണ് കായകുളത്തുള്ള റെന്റ് എ കാറുകാരന്‍ പേട്ട നൌഷാദിന്റെ സ്കോര്‍പ്പിയോ കാര്‍ ഒരു കേസില്‍ കുടുങ്ങുന്നത്. നൌഷാദിന്റെ കയ്യില്‍ നിന്ന് സ്കോര്‍പ്പിയോ വാടകക്ക് എടുത്തവര്‍ അതില്‍ സ്പിരിറ്റ് കടത്തി. സേലത്ത് വെച്ച് തൊണ്ടിയടക്കം പോലീസ് വാഹനം പിടികൂടി. കേസില്ലാതെ വാഹനവും പ്രതികളും ഇറങ്ങും. പക്ഷേ അഞ്ച് ലക്ഷം രൂപ പോലീസുകാര്‍ക്ക് കൊടുക്കണം. അത്രയും കൊടുക്കാതെ കേസില്‍ നിന്ന് ഊരാന്‍ പറ്റുമോ എന്നസ്വേഷിച്ചു നടക്കുന്നു പേട്ട നൌഷാദ്. ആരൊക്കെയോ ഉപദേശിച്ചു. കറ്റാനം ഗിരി പുലിയാ. അയാള്‍ എത്ര വണ്ടിയാ ഇതുപോലെ ഇറക്കീട്ടുള്ളത്. ഗിരീഷേട്ടനെ കാണ്. കാര്യം നടക്കും.

നൌഷാദ് ഗിരീഷേട്ടനെ കണ്ടു. അല്‍പ്പം ചിന്തിച്ചിട്ട് ഗിരി പറഞ്ഞു: വണ്ടി എറക്കാം. പക്ഷേ ഇച്ചിരി കാശ് ചെലവ് വരും. ഒരൊന്നര ലക്ഷം. ഒകെ?
ഒകെ. ഔഷാദ് സമ്മതിച്ചു. ഗിരിയും നൌഷാദും അപ്പു എന്നൊരാളും കൂടി വേറൊരു സ്കോര്‍പ്പിയോ കാറില്‍ സേലം പോലീസ് സ്റ്റേഷനിലേക്ക്.

സേലത്ത് ചെന്ന് പോലീസുമായി ബാര്‍ഗൈനിംഗ്. അഞ്ച് ലക്ഷത്തില്‍ കുറഞ്ഞ് പോലീസ് അടുക്കുന്നില്ല. ഗിരി ഒരു ലക്ഷത്തിലാണ് പിടി. ഒടുക്കം പോലീസ് മൂന്ന് ലക്ഷത്തിന് സമ്മതിച്ചു. ഗിരി അയഞ്ഞില്ല. ഒരേയൊരു ലച്ചം. പോയി വേറെ പണി നോക്കാന്‍ പറഞ്ഞു പോലീസ്.

നിരാശനായി പുറത്തിറങ്ങിയ ഗിരി കണ്ടത് സ്റ്റേഷന്‍ മുറ്റത്ത് പാര്‍ക്ക് ചെയ്തിരിക്കുന്ന പിടിച്ചെടുത്ത സ്കോര്‍പ്പിയോ. ഗിരിക്ക് ഐഡിയ ഉദിച്ചു. നൌഷാദിനെ വിളിച്ചു ചോദിച്ചു. “ആ വണ്ടീടെ വേറെ താക്കോല്‍ ഉണ്ടോ?”
“ഉണ്ട്”
“ഇനി ഒന്നും നോക്കാനില്ല. നീ താക്കോല് അപ്പൂന്റെ കയ്യില്‍ കൊട്...” എന്നിട്ട് അപ്പുവിനോട് പറഞ്ഞു: “ഡാ അപ്പൂ, ഇവിടെങ്ങും ആരുമില്ല. നീ പയ്യനെ വണ്ടിയെടുത്ത് സാ മാട്ടില്‍ ഓടിച്ച് പുറത്തിറങ്ങ്...ബാക്കി കാര്യം പിന്നെ നോക്കാം...ഇപ്പോള്‍ എസ്കേപ്പ്”
“അത് വേണോ അണ്ണാ?”
“എന്താ വേണോന്ന്? ഇതാണ് ചാന്‍‌സ്...പെട്ടെന്നാവട്ടെ...”

അപ്പു മെല്ലെ വണ്ടിയില്‍ കയറി സ്റ്റാര്‍ട്ട് ചെയ്ത് മെല്ലെ മുന്നോട്ടെടുക്കാന്‍ ഭാവിച്ചതും എസ്സൈയും പാര്‍ട്ടിയും പാഞ്ഞു വന്നു.

“ഡായ് അങ്കെ നില്ലെടേ തിരുട്ട് റാസ്‌കല്‍....”
പോലീസുകാര്‍ അലറി. “കാറ് നിപ്പാട്ടുങ്കടാ, നിപ്പാട്ട്...#$%^“
എസ്സൈ അപ്പുവിനെ കോളറില്‍ പിടിച്ച് വലിച്ചു താഴെയിട്ടു. “ഏണ്ട്രാ...ഏമാത്തി കാറു തിരുടി എസ്കേപ് പണ്‍റ ട്രൈ പണ്‍റതാ? നായേ...” ബൂട്ട് കൊണ്ടൊരു ചവിട്ടും.

സ്തബ്ദനായി നിന്ന ഗിരീഷെന്ന റോമിംഗ് ഗിരിയെയും പോലീസ് വളഞ്ഞു പിടിച്ചു. എസ്സൈ ഗിരിയുടെ മുഖമടച്ച് ഒരടി.
“ഉന്‍ പേര് ശൊല്‍ടാ”
ഗിരി
“കിരി...മുത്തുച്ചാമീ, പത്ത് സ്പിരിറ്റു കന്നാസ് അന്ത വണ്ടിക്കുള്ളാ പോട്ടു തൊല...”

മുത്തുച്ചാമിപ്പോലീസ് പത്ത് സ്പിരിറ്റ് കന്നാസ് എടുത്ത് ഗിരിയുടെ സ്കോര്‍പ്പിയോയിലും വെച്ചു.

എസ്സൈ ഗിരിയോട് അലറി. “ഇന്ത വണ്ടിക്കുള്ളെയും സ്പിരിറ്റ് അല്ലവാ...നീ താന്‍ പ്രൈം അക്യൂസ്‌ഡ്. മുത്തുച്ചാമീ ഇവനെ തൂക്കി ഉള്ള പോട്...”

ഒരു സ്കോര്‍പ്പിയോ ഇറക്കാന്‍ ചെന്ന റോമിംഗ് ഗിരിയുടെ മറ്റേ സ്കോര്‍പ്പിയോയിലും സ്പിരിറ്റ്. മൊത്തം കേസില്‍ ഗിരി ഒന്നാം പ്രതി.

ഇതിനകം ഓടിരക്ഷപ്പെട്ട പേട്ട നൌഷാദ് കള്ളവണ്ടി കയറീ നാട്ടിലെത്തി. പിന്നീട് എട്ടു ലക്ഷം രൂപ നല്‍കി കേസില്ലാതെ വണ്ടികളും ഗിരി അടക്കമുള്ള പ്രതികളെയും പുറത്തിറക്കി.

എന്നിട്ടുണ്ടോ ഗിരിക്ക് കുലുക്കം വല്ലതും. പത്രാധിപര്‍ ഗിരി ഇന്നും സര്‍വ്വപ്രതാപത്തോടെയും വാണരുളുന്നു.

Oct 24, 2011

അറബി പാഠം മൂന്ന്

വീട്

ബൈത് = വീട് (House)
ദാര്‍ = വീട് (home)
മന്‍സില്‍ = വസതി
ബെനായ = കെട്ടിടം
ഗുര്‍ഫ (غرفة) = മുറി
ശിഗ്ഗ (شقة) = ഫ്ലാറ്റ്
ഗസ്വ്‌ര്‍ = കൊട്ടാരം
മത്വ്‌ബഖ് = അടുക്കള
ഗുര്‍ഫതിന്നൌം = കുറപ്പു മുറി
ഗുര്‍ഫത്തില്‍ ജുലൂസ് = സ്വീകരണ മുറി
ഹമ്മാം = കുളിമുറി
തുവാലീത്ത് = റ്റോ‌യ്‌ലറ്റ്
ശുര്‍ഫ = ബാല്‍ക്കണി
ജിദാര്‍ = ചുമര്‍
സഗഫ് = മച്ച്
ബവാബ = ഗേറ്റ്
ബാബ് = വാതില്‍
നാഫിദ = ജനല്‍
ശുബാക്ക് = ഗ്രില്‍‌സ്
സിതാര= കര്‍ട്ടന്‍
ഹാജസ് = സ്ക്രീന്‍
സരീര്‍ = കട്ടില്‍
ഫിറാശ് = കിടക്ക
മാഇദ, തറാബീസ, ത്വാവ്‌ല = മേശ
കുര്‍സി = കസേര
ദിക്ക = ബെഞ്ച്
ഇസ്‌കം‌ല = സ്റ്റൂള്‍
റഫ് = ഷെല്‍ഫ്
കനബ = സോഫ
മഫ്‌റൂശാത്ത് = ഫര്‍ണിച്ചര്‍
ദൂലാബ് = അലമാരി
മിറായ = കണ്ണാടി
സിജ്ജാദ = വിരിപ്പ്
ശര്‍ശഫ് =കിടക്കവിരി
ലെഹാഫ് = പുതപ്പ്
മിഖദ്ദ (مخدة) = തലയിണ
ഫിരിന്‍ = അടുപ്പ്
മിത്വ്‌ബഖ = സ്റ്റൌ
മിദ്‌ഫ‌അ = ഹീറ്റര്‍
തല്ലാജ = റഫ്രിജറേറ്റര്‍
ഇനാ = പാത്രം
സ്വഹന്‍ = തളിക
കാസ് = ഗ്ലാസ്സ്
ഗര്‍ശ = കുപ്പി
മിഗ്‌റഫ = തവി
ഫിന്‍‌ജാന്‍ = പിഞ്ഞാണം, സോസര്‍
മല്‍‌അഗ (ملعقة) = സ്പൂണ്‍
മിഫ്‌താഹ് = താക്കോല്‍
ഗഫ്‌ല്‍ = പൂട്ട്

ബൈതുക ഗരീബ്?
= നിന്റെ വീട് അടുത്ത് തന്നെയാണോ. (ഗരീബ് =അടുത്ത്)

ഗുര്‍ഫതുക മുരീഹ?
= നിന്റെ മുറി സൌകര്യപ്രദമാണോ? (റാഹ = Comfort. മുരീഹ = Comfortable)

അന ഉരീദ് ശിഗ്ഗ സഗീറ
= എനിക്ക് ചെറിയ ഒരു ഫ്ലാറ്റാണ് വേണ്ടത്. (അന ഉരീദ് = ഞാന്‍ ആഗ്രഹിക്കുന്നു, ആവശ്യപ്പെടുന്നു etc)

ഫീ അഹദ് ദാഖില്‍ ഹമ്മാം?
=കുളിമുറിക്കകത്ത് ആരെങ്കിലുമുണ്ടോ? (ദാഖില് (داخل) = അകത്ത്)

ഇസ്‌തറഹ് അലല്‍ കുര്‍സി ബര്‍‌റ
= പുറത്ത് കസേര മേല്‍ ഇരിക്കൂ (ഇസ്‌തറഹ് = വിശ്രമിക്കൂ, ഇരിക്കൂ. ഇസ്‌തിറാഹ= വിശ്രമാലയം. ബര്‍‌റ = പുറത്ത്)

അഖൂയ നായിം ഫീ ഗുര്‍ഫതുഹ്
=എന്റെ സഹോദരന്‍ അവന്റെ മുറിയില്‍ ഉറങ്ങുകയാണ്.

ബന്നദ് അല്‍ ബവാബ
=ഗേറ്റ് അടക്കൂ

അന ഉരീദു ശര്‍ശഫ് സൈന്‍
=എനിക്ക് നല്ലൊരു ബെഡ് ഷീറ്റ് വേണം (സൈന്‍ = നല്ലത്, അഴകുള്ളത്)

ശീല്‍ ഹാദല്‍ കറാസി ഇലാ ഗുര്‍ഫത്തില്‍ ജുലൂസ്
= ഈ കസേരകള്‍ സ്വീകരണമുറിയിലേക്ക് കൊണ്ടു പോകൂ. (കുര്‍സി= കസേര, കറാസി= കസേരകള്‍)

അസ്സന്ദുഖ് ഫീ ശൈ ആനിയ
= പെട്ടിയില്‍ കുറച്ച് പാത്രങ്ങളുണ്ട്. സന്‍‌ദുഖ് = പെട്ടി. ഇന=പാത്രം ആനിയ = പാത്രങ്ങള്‍)

ഹുവ യസ്‌തരീഹ് അലല്‍ കനബ
=അദ്ദേഹം സോഫയില്‍ ഇരിക്കുന്നു.

അറബി പാഠം - രണ്ട്

കുടുംബം
ആ‌ഇല = കുടുംബം
ബൈത്ത് = വീട്
അബു = പിതാവ്
ഉമ്മ്‌ = മാതാവ്
വാലിദൈന്‍ = മാതാപിതാക്കള്‍
അഖ് (اخ) = സഹോദരന്‍
ഉഖ്‌ത് (اخت) = സഹോദരി
ഇബ്‌ന്‍ = മകന്‍
ബി‌ന്‍ത് = മകള്‍
സൌജ് = ഭര്‍ത്താവ്
സൌജ, ഹറം = ഭാര്യ
ഗുലാം (غلام) = ആണ്‍കുട്ടി
ജാരിയ = പെണ്‍കുട്ടി
ശായിബ് = വൃദ്ധന്
അജൂസ് (عجوس) =വൃദ്ധ
ജദ്ദ് = അപ്പൂപ്പന്‍
ജദ്ദ = അമ്മൂമ്മ
ഖാല്‍ (خال) =അമ്മാവന്‍
ഖാല = മാതൃ സഹോദരി
അം (عم) =പിതൃ സഹോദരന്‍
അമ്മ (عمة) = പിതൃസഹോദരി
അരീസ് = മണവാളന്‍
അറൂസ് = മണവാട്ടി
സ്വിഹ്‌റ് = അളിയന്‍
ഖതന്‍ = അമ്മായി അപ്പന്‍
കന്ന = പുത്രവധു
ഹഫീദ് = പൌത്രന്‍
ഹഫീദ = പൌത്രി

അബൂയ = എന്റെ പിതാവ്
അഖൂയ = എന്റെ സഹോദരന്‍
ഹറമക് = നിന്റെ ഭാര്യ
ബിന്‍‌തക് = നിന്റെ മകള്
മിന്‍ ഹാദല്‍ വലദ് ? = ഈ കുട്ടി ആരാണ്?
മിന്‍ ഹാദാക് അശ്ശായിബ്? ഈ വൃദ്ധന്‍ ആരാണ്?
വെയ്‌ന്‍ യജ്‌ലിസ് അഖൂക്ക്? = നിന്റെ സഹോദരന്‍ എവിടെ താമസിക്കുന്നു.
വെയ്‌ന്‍ യസീര്‍ ഖാലക്? നിന്റെ അമ്മാവന്‍ എവിടെ പോകുന്നു?
മിന്‍ ഹാദില്‍ ജാരിയ? =ഈ പെണ്‍‌കുട്ടി ആരാണ്?
ഇന്‍‌ത ബിന്‍ മിന്‍? = നീ ആരുടെ മകനാണ്?
അന അഖൂ റാഷിദ് = ഞാന്‍ റാഷിദിന്റെ സഹോദരനാകുന്നു.
നഹ്‌നാ അബ്‌നാ അദ്ദുക്‍തൂര്‍ = ഞങ്ങള്‍ ഡോക്റ്ററുടെ പുത്രന്മാരാകുന്നു.
എഹ്‌നാ ബനാത്ത് സലീം = ഞങ്ങള്‍ സലീമിന്റെ പുത്രിമാരാകുന്നു.
ഹുവ ഖാല്‍ ഹാദല്‍ വലദ് = അയാള്‍ ഈ കുട്ടിയുടെ അമ്മാവനാകുന്നു.
ഹിയ ഉഖ‌ത്ത് ശരീകി = അവള്‍ എന്റെ കൂട്ടുകാരന്റെ സഹോദരി ആകുന്നു.


(ടിപ്പ്: അറബി ഉച്ചാരണം മനസ്സിലാക്കാന്‍ അറബിയില്‍ കൊടുത്തിട്ടുള്ള ഭാഗം കോപ്പി ചെയ്ത് ഗൂഗിള്‍ ട്രാന്‍‌സ്ലേറ്റിലേക്ക് പേസ്റ്റ് ചെയ്‌തിട്ട് Listen ബട്ടണ്‍ അമര്‍ത്തിയാല്‍ മതി. From: English To: Arabic ആയിരിക്കട്ടെ ട്രാന്‍‌സ്ലേറ്ററില്‍ :) )

അറബി പാഠം 1

ഗള്‍ഫിലെ സംസാരഭാഷ

ആറു മലയാളിക്ക് നൂറു മലയാളം എന്നാണ് ചൊല്ല്. അങ്ങനെയെങ്കില്‍ പശ്‌ചിമേഷ്യയുടെ വിസ്തൃതിക്കും ഭൂപ്രദേശങ്ങളുടെ വൈവിധ്യത്തിനുമനുസരിച്ച് എണ്ണിയാലൊടുങ്ങാത്ത രൂപഭേദങ്ങള്‍ ഭവിച്ച അറബി ഭാഷയുടെ വൈവിധ്യമാര്‍ന്ന വാമൊഴിശൈലികള്‍ ഒരു പഠനസഹായിയില്‍ ഉള്‍ക്കൊള്ളിക്കാന്‍ ആര്‍ക്കു സാധിക്കും !

സംസാരഭാഷക്ക് അതിന്റേതായ പദസമ്പത്തും ശൈലികളുമുണ്ട്. ഗള്‍ഫിലെ അറബി സംസാരഭാഷ പരിചയപ്പെടുത്താനുള്ള ലളിതമായ ഒരുദ്യമമാണിത്. അക്ഷരമാലയോ എഴുത്തോ ഗഹനമായ വ്യാകരണനിയമങ്ങളോ പഠിപ്പിക്കാനല്ല ഉദ്ദേശിക്കുന്നത്. അറബി നാടുകളില്‍ ജോലി ചെയ്യുന്ന, അറബി തീരെ അറിയാത്ത മലയാളി സുഹൃത്തുക്കള്‍ക്ക് പ്രയോജനമാവുന്ന വിധം ധാരാളം അത്യാവശ്യമായ ഒറ്റവാക്കുകളും ലഘുവാചകങ്ങളും ചോദ്യോത്തരങ്ങളും ഉള്‍ക്കൊള്ളിച്ച് വാക്യങ്ങളും വാക്യാംശങ്ങളും ഉദാഹരണമായി പറഞ്ഞ് കൊണ്ട് സംസാരഭാഷ പരിചയപ്പെടുത്തുക മാത്രമാണ്. സംസാരഭാഷയില്‍ ഉപയോഗപ്പെടുന്ന പദസമ്പത്ത് പരമാവധി ഉള്‍ക്കൊള്ളിക്കാന്‍ ശ്രമിക്കാം. വാക്കുകളുടെ അറബി രൂപം വേണ്ടിടത്ത് മാത്രം ചേര്‍ക്കുവാനേ ഉദ്ദേശിക്കുന്നുള്ളൂ.
എന്തായാലും നിങ്ങളുടെ അഭിപ്രായ നിര്‍ദ്ദേശങ്ങള്‍ അറിയിക്കുക.

നമുക്ക് തുടങ്ങാം.
ആദ്യം സര്‍വ്വനാമങ്ങള്‍.

അവന്‍ =ഹുവ
അവര്‍ = ഹും
അവള്‍ = ഹിയ
നീ (പുരുഷനോട്) = ഇന്‍‌ത
നിങ്ങള്‍ = ഇന്‍‌തൂ
നീ (സ്ത്രീയോട്) = ഇന്‍‌തി
ഞാന്‍ = അന
ഞങ്ങള്‍ = എഹ്‌നാ (നഹ്‌‌നു എന്നാണ് യഥാര്‍ത്ഥ രൂപം)

ഉദാഹരണങ്ങള്‍:

ഹുവ ദുക്‍തൂര്‍ = അവന്‍ ഒരു ഡോക്റ്ററാകുന്നു
ഹുവ മുഹന്‍‌ദിസ് = അവന്‍ ഒരു എഞ്ചിനിയര്‍ ആകുന്നു)
ഹുവ സായിഖ് = അവന്‍ ഒരു ഡ്രൈവര്‍ ആകുന്നു
ഹിയ മുമത്തല (ممثلة) = അവള്‍ ഒരു നടി ആകുന്നു.
ഹിയ മുമര്‍‌രിദ (ممرضة) = അവള്‍ ഒരു നേഴ്‌സ് ആകുന്നു.
ഇന്‍‌ത ത‌അ‌ബാന്‍? = നീ ക്ഷീണിതനാണോ?
ഇന്‍‌ത ജൂആന്‍? = നീ വിശന്നിരിക്കുകയാണോ?
ഇന്‍‌ത സ‌(Z)അ്‌ലാന്‍? = നീ പിണങ്ങിയിരിക്കുകയാണോ?
ഇന്‍‌തി ഉഖ്‌ത് സലീം? = നീ സലീമിന്റെ സഹോദരിയാണോ?
ഇന്‍‌തൂ താലിബാന്‍ ഫീ മദ്രസ? = നിങ്ങള്‍ സ്കൂള്‍ വിദ്യാര്‍ത്ഥികളാണോ?
ഇന്‍‌തൂ മുവദ്ദിഫീന്‍ ഹുകൂമ? = നിങ്ങള്‍ ഗവണ്മെന്റ് ഉദ്യോഗസ്ഥരാണോ?
അന ത്വയ്യാര്‍ ഫീ ത്വൈറാനുല്‍ ഹിന്ദ് = ഞാന്‍ എയര്‍ ഇന്ത്യയിലെ പൈലറ്റ് ആകുന്നു.
എഹ്‌നാ ഫര്‍ഹാനീന്‍ വാജിദ് = ഞങ്ങള്‍ വളരെ സന്തുഷ്ടരാണ്.
എഹ്‌നാ അത്വ്‌ശാനീന്‍ വാജിദ് = ഞങ്ങള്‍ നന്നായി ദാഹിക്കുന്നു.