Sep 9, 2008

ഫോട്ടോഷോപ്പിലെ ലേയര്‍ മാസ്‌ക് (Layer Mask in Photoshop)

ഇവിടെപ്പറഞ്ഞിരിക്കുന്ന ചെലതൊക്കെ മനസ്സിലാകണമെങ്കില്‍ ആദ്യം ലോ ലവിടുത്തെ “ഫോട്ടോഷോപ്പ് ലേയറുകള്‍” എന്ന പോസ്‌റ്റ് വായിച്ചേച്ചും വരിക (കട്.കോവാലകൃഷ്‌ണന്‍!) :)

ഫോട്ടോഷോപ്പിലെ വളരെ പ്രധാനപ്പെട്ട ഒരു ഘടകമാണ് ലേയര്‍ മാസ്‌ക്.

എന്താണ് ലേയര്‍ മാസ്‌ക് ? ലേയര്‍ മാസ്‌കിന്റെ പ്രാധാന്യമെന്ത്? “നമുക്ക് പരിശോധിക്കാം“.. (കട്. നാലാം ക്ലാസ്സിലെ സയന്‍സ് പുസ്തകം!)

എഡിറ്റു ചെയ്യാവുന്ന സെലക്ഷനുകളാണ് ലേയര്‍ മാസ്‌കുകള്‍. ലേയറുകള്‍ക്ക് പരിക്കേല്പിക്കാതെ മാറ്റത്തിരുത്തലുകള്‍ വരുത്തുക (Non Destructive Editing) എന്ന പ്രക്രിയയില്‍ നിര്‍ണ്ണായക വേഷം ആടുന്നത് മൂപ്പരാണ്.

ലേയര്‍ മാസ്‌കുകള്‍ കൈകാര്യം ചെയ്യാന്‍ വളരെ എളുപ്പവും സൌകര്യവുമാണ്. ഒരു മുഴുവന്‍ ഗ്രേസ്കെയില്‍ ഇമേജ് (ചാരപ്പടം!) എന്ന പോലെ തന്നെ നമുക്ക് ഈ മാസ്‌കുകളെ പരിഗണിക്കാം.എന്നിട്ട് അതിന്മേല്‍ ഫില്‍ട്ടറുകള്‍ പ്രയോഗിക്കാം, സെലക്ഷന്‍ റ്റൂള്‍സ് ഉപയോഗിച്ച് പല കളികള്‍ കളിക്കാം, അഡ്‌ജസ്റ്റ് മെന്റ്‌സ് റ്റൂള്‍സ് ഉപയോഗിക്കാം, അങ്ങനെ അങ്ങനെ ഈ മാസ്‌ക് വേലായുധന്റെ തിരുമാറത്ത് നമുക്ക് പലതും പയറ്റാം...

മാസ്‌ക് കണ്ടാലറിയാം ഇമേജിലെ പഞ്ഞം! എന്നച്ചാ ലേയര്‍ മാസ്‌ക് ഇമേജിനെ എങ്ങനെ ബാധിക്കുന്നു എന്ന് ലേയറിലേക്ക് ഒറ്റനോട്ടം നടത്തിയാല്‍ തന്നെ നമുക്ക് മനസ്സിലാകും.

ആരോട് കൂട്ടു കൂടുന്നതിലും ഈ ചങ്ങാതിക്ക് ഒരു വിരോധവുമില്ല. വെക്‍റ്റര്‍ മാസ്‌ക്, ലേയര്‍ ഗ്രൂപ്പ്, അഡ്‌ജസ്റ്റ് മെന്റ് ലേയേഴ്സ്... എവിടെ വേണമെങ്കിലും ലേയര്‍ മാസ്‌കിനെ കൊള്ളിക്കാം.

നമ്മുടെ സെലക്ഷന്‍ സേവ് ചെയ്തു വെക്കാനും ലേയര്‍മാസ്ക് നമ്മെ അനുവദിക്കുന്നുണ്ട്. ഓരോ തവണയും നാം നമ്മുടെ ഡോക്കുമെന്റ് സേവ് ചെയ്യുമ്പോള്‍ ലേയര്‍ മാസ്‌കും കൂടെ സേവ് ആകും.


ശരിക്കും എന്തിനാണ് ലേയര്‍ മാസ്‌ക് ഉപയോഗിക്കുന്നത് ?

പിക്‍സലുകളെ മറച്ചു വെക്കാനാണെന്ന് ഉത്തരം. അഡ്‌ജസ്റ്റ്മെന്റ് ലേയറുകള്‍ ഉപയോഗിക്കുമ്പോള്‍ ഉളവാകുന്ന റിസല്‍റ്റ് മാസ്‌ക് ചെയ്യാനും ലേയര്‍ മാസ്‌ക് ഉപയോഗിക്കാറുണ്ട്. ഈ കുറിപ്പില്‍ ലേയര്‍ മാസ്‌ക് ഉപയോഗിച്ച് പിക്‍സലുകളെ മറക്കുന്നതിനെക്കുറിച്ചാണ് പറയുന്നത്.

ശരി ശരി...

ഈ ലേയര്‍ മാസ്‌കുകള്‍ എങ്ങനെയാണ് പ്രവര്‍ത്തിക്കുന്നത്?

ലേയര്‍ മാസ്‌ക് ആഡ് ചെയ്തിട്ടുള്ള ലേയറുകളെ എങ്ങനെ പരിഗണിക്കണമെന്ന് ഫോട്ടൊഷോപ്പിനോട് സൂത്രമുപദേശിക്കുകയാണ് സത്യത്തില്‍ ലേയര്‍ മാസ്‌കുകള്‍ ചെയ്യുന്നത്. ചാര (ഗ്രേ) നിറത്തിന്റെ പല ഷേഡുകള്‍ ആണ് മാസ്‌കിന് ആധാരം. നമുക്ക് തല്‍ക്കാലം കറുപ്പും വെളുപ്പും മാത്രമായ മാസ്‌കുകള്‍ ശ്രദ്ധിക്കാം.


അതേയ്, ഈ ലേയര്‍ മാസ്‌ക് മനസ്സിലാക്കാനായി താഴെപ്പറയുന്നവ ഒന്നു ശ്രദ്ധിക്കണേ...

*ഒരു ലേയര്‍ മാസ്‌കിലെ കറുത്ത നിറം ആ മാസ്‌ക് ചേര്‍ത്തിട്ടുള്ള ലേയറിലെ പിക്‍സലുകളെ മറയ്‌ക്കുന്നു. എന്നു വെച്ചാല്‍ പിക്‍സലുകളെ ട്രാന്‍‌സ്‌പരെന്റ് ആക്കുന്നു.

*ഒരു ലേയര്‍ മാസ്‌കിലെ വെളുത്ത നിറം ആ മാസ്‌ക് ചേര്‍ത്തിട്ടുള്ള ലേയറിലെ പിക്‍സലുകളെ അതേ പടി വെളിവാക്കുന്നു. എന്നു വെച്ചാല്‍ പിക്‍സലുകളെ ഒന്നും ചെയ്യുന്നില്ലാന്ന്.


ഉദാഹരണം പറയാം.


Layer1 എന്നൊരു ലേയര്‍ മഞ്ഞനിറത്തില്‍...

അതിനു മീതേ ഓറഞ്ചു നിറത്തിലുള്ള മറ്റൊരു ലേയര്‍ ...

ഓറഞ്ച് ലേയറിന് തൊട്ടു വലതു വശത്തായി ഒരു ബ്ലാക് & വൈറ്റ് തമ്പ് നെയില്‍ കാണാം. ഒരു ഇമേജാണത്. അതു തന്നെയാണ് നമ്മുടെ ലേയര്‍ മാസ്‌ക്.

ഈ ഉദാഹരണം എന്താണ് സൂചിപ്പിക്കുന്നത്? അതെന്തെന്നാല്‍ ഓറഞ്ചു ലേയറിനോട് ചേര്‍ത്തിട്ടുള്ള ലേയര്‍ മാസ്‌കില്‍ നാം ഒരു വട്ടം വരച്ച് അതില്‍ കറുപ്പ് ചായം നിറച്ചു, ആ കറുപ്പ് വട്ടം ഓറഞ്ചു ലേയറിലെ അത്രയും ഭാഗത്തെ പിക്സലുകളെ സുതാര്യമാക്കി. അപ്പോ താഴത്തെ മഞ്ഞ ലേയര്‍ ആ വട്ടത്തിലൂടെ കാണായി. . നമ്മുടെ ഇമേജുകള്‍ക്ക് യാതൊരു കേടുപാടും വരാതെ അത് എഡിറ്റ് ചെയ്യാമെന്നതാണ് ലേയര്‍ മാസ്‌ക് നല്‍കുന്ന പ്രധാന സൌകര്യം. മാറ്റങ്ങള്‍ വേണ്ടെങ്കില്‍ മാസ്‌ക് ഡിലീറ്റ് ചെയ്യുകയോ ഡിസേബിള്‍ ചെയ്യുകയോ ആവാം.


ഒരുദാഹരണം. താഴത്തെ ചിത്രം ശ്രദ്ധിക്കൂ.(ഞെക്കി വലുതാക്കി കാണൂ)





ദാ നോക്കൂ മാസ്‌ക് തനിയെ. (ലേയര്‍ മാസ്‌ക് തമ്പ്നെയിലില്‍ ആള്‍ട്ട് കീ അമര്‍ത്തിക്കൊണ്ട് ഞെക്കിയാല്‍ മാസ്‌ക് മാത്രമായി കാണാം).


ഓര്‍ക്കേണ്ടത് : കറുപ്പ് നിറം പിക്‍സലിനെ മറയ്‌ക്കുന്നു.

ഇനി ലേയര്‍ മാസ്‌ക് ഉണ്ടാക്കുന്ന വിധം പഠിക്കാം.


  1. സുതാര്യമായ ഒരു ലേയര്‍ മാസ്ക് ഉണ്ടാക്കുന്നത്. Creating a Layer Mask (Reveal All)

ലേയര്‍ പാലറ്റിലെ Add Layer Mask ഐക്കണില്‍ ക്ലിക്ക് ചെയ്ത് ഓള്‍ വിസിബിളായ ഒരു ലേയര്‍ മാസ്ക് ഉണ്ടാക്കാം. (PS. CS3 മെനുവില്‍ Layer>Layer Mask>Reveal All). ഇത് ഒരു വൈറ്റ് മാസ്‌ക് ആയിരിക്കും. അതിനര്‍ത്ഥം ആ ലേയറിനെ പിക്സലിനെ ഒന്നും മറയ്‌ക്കുന്നില്ല എന്നാണല്ലോ. ഈ മാസ്‌കില്‍ കറുപ്പ് നിറം നിറക്കുന്ന ഭാഗത്തെ പിക്സലുകള്‍ അപ്രത്യക്ഷമാകാന്‍ തുടങ്ങും. (ഇതൊന്നും ലേയറിനെ ബാധിക്കുന്നില്ല എന്നോര്‍ക്കുമല്ലോ).

ഈ ചിത്രത്തില്‍ ഡോകുമെന്റ് വിന്‍ഡോയില്‍ ഓറഞ്ചു നിറത്തിലെ ലേയര്‍ അതേപടി കാണാം. കാരണം വൈറ്റ് മാസ്‌ക് പിക്സലിനെ മറയ്‌ക്കുന്നില്ല.




  1. ഒളി‌മാസ്‌കുകള്‍ ഉണ്ടാക്കുന്നത്. Creating a Layer Mask (Hide All)

കറുപ്പ് നിറം നിറഞ്ഞ ഒരു മാസ്‌കാണ് ഓള്‍ ഹിഡന്‍ മാസ്‌ക് എന്നത് കൊണ്ട് ഉദ്ദേശിക്കുന്നത്.തീര്‍ച്ചയായും ഇത്തരം മാസ്‌കുള്ള ലേയറിലെ പിക്സലുകള്‍ ഹിഡന്‍ ആയിരിക്കുമല്ലോ. ലേയര്‍ പാലറ്റിലെ Add Layer Mask ഐക്കണില്‍ ക്ലിക്ക് ചെയ്യുമ്പോള്‍ ALT കീ കൂടീ അമര്‍ത്തിപ്പിടിച്ച് ഞെക്കുക. (PS. CS3 മെനുവില്‍ Layer>Layer Mask>Hide All)നമ്മുടെ ഡോക്കുമെന്റ് വിന്‍ഡോയില്‍ ബാക്ക്ഗ്രൌണ്ട് ലേയറിലെ വെളുപ്പ് നിറം കാണാം. കാരണം മുകളിലെ ഓറഞ്ച് നിറമുള്ള ലേയറിലെ പിക്സലിനെയെല്ലാം നമ്മുടെ ബ്ലാക്ക് മാസ്‌ക് മറച്ചിരിക്കുന്നു.


  1. ലേയര്‍ മാസ്‌കില്‍ ബ്രഷ് കൊണ്ട് പെയിന്റ് ചെയ്യുന്നത്.

ലേയര്‍ പാലറ്റിലെ മാസ്‌ക് തമ്പ്നെയില്‍ ക്ലിക്ക് ചെയ്ത് സെലക്റ്റ് ചെയ്ത ശേഷം ഏതെങ്കിലും ബ്രഷ് കൊണ്ട് നമുക്ക് പെയിന്റ് ചെയ്യാം. മാസ്‌ക് സെലക്റ്റ് ചെയ്യുമ്പോള്‍ ഫോര്‍ ഗ്രൌണ്ട്, ബ്ലാക്ക് ഗ്രൌണ്ട് കളറുകള്‍ കറുപ്പും വെളുപ്പും ആയിരിക്കും. കറുപ്പ് നിറം കൊണ്ട് പെയിന്റ് ചെയ്യുമ്പൊള്‍ മാസ്‌ക് ഇമേജിലെ പിക്സലിനെ മറ‌യ്‌ക്കുന്നു. വെളുപ്പ് നിറം കൊണ്ടാണെങ്കില്‍ മാസ്‌ക് സുതാര്യമാകുന്നു, പിക്‍സലുകള്‍ വെളിവാകും. (ഫോര്‍ ഗ്രൌണ്ട്, ബ്ലാക്ക് ഗ്രൌണ്ട് കളറുകള്‍ മാറ്റുന്നതിന് X കീ അമര്‍ത്തിയാല്‍ മതി. എന്നിട്ട് മാസ്‌കുകളുണ്ടാക്കി വരച്ചു നോക്കൂ).

Reveal All, Hide All മാസ്‌കുകളില്‍ കറുപ്പും വെളുപ്പും ഉപയോഗിച്ച് വരച്ചിരിക്കുന്നത് ശ്രദ്ധിക്കുക.





4.ഗ്രേഡിയന്റ് മാസ്ക്

ബ്രഷ് കൊണ്ട് പെയിന്റ് ചെയ്യുന്നത് പോലെ ഗ്രേഡിയന്റെ റ്റൂള്‍ ഉപയോഗിച്ചും മാസ്‌ക് ഉണ്ടാക്കാം. ശ്രദ്ധിക്കേണ്ട കാര്യം ഗ്രേഡിയന്റ് കളറുകള്‍ കറുപ്പും വെളുപ്പും ആയിരിക്കണം എന്നതാണ്. മാസ്‌ക് തമ്പ്നെയില്‍ സെലക്റ്റ് ചെയ്ത് ഗ്രേഡിയന്റ് റ്റൂള്‍ കൊണ്ട് ഡ്രാഗ് ചെയ്യുക. വിവിധ ഗ്രേഡിയന്റ് ഓപ്‌ഷനുകള്‍ പരീക്ഷിക്കുക.

5.ഗ്രേ മാസ്‌കുകള്‍.

കറുപ്പ് പിക്‍സലിനെ മറയ്‌ക്കുകയും വെളുപ്പ് പിക്‍ലിനെ വെളിവാക്കുകയും ചെയ്യുമെങ്കില്‍ ഈ രണ്ട് നിറങ്ങള്‍ക്കിടയിലുള്ള ഏതു വര്‍ണ്ണവും വിവിധ ഒപ്പാസിറ്റിയിലുള്ള റിസല്‍റ്റ് ഇമേജില്‍ ഉണ്ടാക്കുമല്ലോ. പല വര്‍ണ്ണങ്ങള്‍ കൊണ്ട് മാസ്‌കില്‍ വരക്കുകയും ബഹുവര്‍ണ്ണ ഗ്രേഡിയന്റ് പ്രയോഗിക്കുകയും ചെയ്യുക.

  1. ലേയര്‍ മാസ്‌ക് ഡിസേബിള്‍ ചെയ്യാന്‍.

ലേയര്‍ മാസ്‌ക് തമ്പ്നെയില്‍ Shift+Click ചെയ്താല്‍ മതി.

  1. ലേയര്‍ മാസ്‌ക് ഡിലീറ്റ് ചെയ്യാന്‍.

    ലേയര്‍ മാസ്‌ക് തമ്പ്നെയിലില്‍ റൈറ്റ് ക്ലിക്ക് ചെയ്ത് കോണ്‍റ്റെക്സ്റ്റ് മെനുവില്‍ നിന്ന് Delete Layer Mask അല്ലെങ്കില്‍ മെനുവില്‍ Layer>Layer Mask>Delete. അതുമല്ലെങ്കില്‍ ലേയര്‍ പാലറ്റില്‍ താഴെ വേസ്‌ബിന്‍ ഐക്കണില്‍ ക്ലിക്ക് ചെയ്താലും മതി.

  2. ലേയര്‍ മാസ്‌ക് തമ്പ്നെയിലില്‍ റൈറ്റ് ക്ലിക്ക് ചെയ്ത് കോണ്‍റ്റെക്സ്റ്റ് മെനുവില്‍ Apply Layer Mask എന്ന കമാന്‍ഡ് കൊടുത്താല്‍ മാസ്‌ക് ലേയറിനോട് മെര്‍ജ് ആകും. പിന്നെ മാസ്‌കില്ല. ഇമേജില്‍ നേരിട്ട് വ്യത്യാസം വരും

ഇനി ലേയര്‍ മാസ്‌കിന്റെ വിവിധ പ്രായോഗങ്ങള്‍, മാസ്‌കും സെലക്ഷനും, അഡ്‌ജസ്റ്റ്മെന്റ് ലേയറുകളിലെ മാസ്‌കിംഗ്, വെക്‍റ്റര്‍ മാസ്ക് മുതലായ പിന്നാലെ നോക്കാം; ദൈവം അനുവദിക്കട്ടെ...

Sep 6, 2008

ഫോട്ടോഷോപ്പ് ലേയറുകള്‍: ഒരാമുഖം.


ഫോട്ടോഷോപ്പിന്റെ മര്‍മ്മപ്രധാനമായ പ്രത്യേകതകളില്‍ ഒന്നാണ് ലേയറുകള്‍. കോംപ്ലക്സ് ഇമേജുകള്‍ നിര്‍മ്മിക്കുവാന്‍ ഉപയോഗിക്കുന്ന അടിസ്ഥാന ഫീച്ചര്‍. തുടക്കക്കാരെ ഒത്തിരി കുഴക്കുന്ന ജഗജില്ലി. ഒന്നു വഴങ്ങിക്കിട്ടാന്‍ ഇശ്ശി സമയമെടുത്തെന്നിരിക്കും. പരിഭ്രമിക്കേണ്ട. ലേയറുകളുടെ അടിസ്ഥാന പ്രവര്‍ത്തനങ്ങള്‍ മനസ്സിലാക്കി നന്നായി പരിശീലിച്ചാല്‍ സംഗതി നിങ്ങളുടെ വിളിപ്പുറത്തു വരും. (ങാഹാ, അത്രക്കായോ!)

ലേയറുകള്‍ ആദ്യമായി അവതരിക്കപ്പെടുന്നത് ഫോട്ടോഷോപ്പ് വേര്‍ഷന്‍ 3 ല്‍ ആണ്.

എന്താണീ ലേയര്‍ എന്നൊന്നു നോക്കാം.

ഒന്നിനു മേല്‍ ഒന്നായി അടുക്കി വെക്കപ്പെടുന്ന ഇമേജ് പാളികളാണ് ലേയറുകള്‍ എന്ന് സാമാന്യമായി പറയാം. ഒരുദാഹരണത്തിലൂടെ ഇതു വിശദീകരിക്കാം.

എന്റെ കയ്യില്‍ ഒരു പേപ്പര്‍ ഉണ്ടെന്ന് സങ്കല്‍പ്പിക്കുക. ഞാന്‍ അതില്‍ ചുവപ്പ് പെയിന്റ് അടിക്കുന്നു. എന്നിട്ടു ഒരു സുതാര്യമായ ഫിലിം പേപ്പര്‍ എടുത്ത് വട്ടത്തില്‍ ഒരു “സര്‍ക്കിള്‍ “ ‍(!) വെട്ടിയെടുക്കുന്നു. അതില്‍ ഞാന്‍ മഞ്ഞ പെയിന്റ് അടിക്കുന്നു. അതു ചുവന്ന പേപ്പറിനു മീതേ വെക്കുന്നു. പിന്നീട് വേറൊരു ഫിലിം എടുത്ത് “TYPE” എന്ന അക്ഷരങ്ങള്‍ വെട്ടിയെടുത്ത് നീലച്ചായമടിച്ച് നമ്മുടെ “സര്‍ക്കിളു വട്ടത്തിനു“ മീതേ വെക്കുന്നു. ഇപ്പോള്‍ എനിക്കു ഒരു ബാക്ക്ഗ്രൌണ്ട് ലേയറും (ചുവന്ന പേപ്പര്‍) ‍രണ്ടു “സാദാ” ലേയറുകളും (മഞ്ഞ വട്ടവും നീല ടൈപ്പ് ലേയറും) കിട്ടി.

type.jpgചിത്രം ശ്രദ്ധിക്കുക.

p1.jpg

ഈ ചിത്രത്തില്‍ ബാക് ഗ്രൌണ്ട് ലേയറിനു മീതേ LearnGrafx എന്ന ടൈപ് ലേയര്‍ കാണാം.
അപ്പോള്‍ ലേയറുകള്‍ എന്താണെന്നു കത്തിയെന്നു വിചാരിക്കുന്നു. ഇതുമാതിരി നമുക്കു ഫോട്ടോഷോപ്പില്‍ ലേയറുകള്‍ ഉണ്ടാക്കി ആ ലേയറുകളില്‍ എന്തു വികൃതിയും കാണിക്കാം. ഓരോ ലേയറിനേയും നമുക്കിഷ്ടമുള്ളതു പോലെ പരിഷ്കരിക്കാം. അതിന്മേല്‍ വരക്കാം, തുടക്കാം, മുറിക്കാം, ഡിലീറ്റാം, എങ്ങോട്ടു വേണമെങ്കിലും നീക്കിക്കൊണ്ടു പോകാം, സ്റ്റൈലുകള്‍ കൊടുക്കാം..അങ്ങനെയങ്ങനെ നിരവധിയനവധി ബമ്പര്‍ സമ്മാനങ്ങള്‍ നിങ്ങളെ കാത്തിരിക്കുന്നു.

ഫോട്ടോഷോപ്പ് ലേയറുകളാല്‍ സമൃദ്ധം:

ലേയറുകള്‍ നിയന്ത്രിക്കപ്പെടുന്നത് ലേയര്‍ പാലറ്റ് വഴിയാണ്. (Layers palette). ലേയര്‍ പാലറ്റ് ദൃശ്യമാകാന്‍ മെനുവില്‍ Window>Layers. അല്ലെങ്കില്‍ ‍(F7) പ്രെസ്സ് ചെയ്യുക. ഈ പാലറ്റില്‍ നിങ്ങള്‍ക്ക് ലേയറുകളും ലേയറുകളിലെ ഉള്ളടക്കം നഖച്ചിത്രങ്ങളായും(Thumbnail) കാണാം. താഴ് ഭാഗത്ത് കുറെ ഐക്കണുകള്‍( കൊച്ചു ചിത്രങ്ങള്‍) ഉണ്ട്.

ലേയറുകള്‍ ഉണ്ടാക്കുന്നത്…

layer-pallate-icons.jpgഈ ലേയര്‍ പാലറ്റ് ശ്രദ്ധിക്കുക. ഏറ്റവും താഴെ വലത്തു നിന്നു രണ്ടാമത്തേത് പുതിയ ലേയര്‍ (New) ഉണ്ടാക്കാനുള്ള ഐക്കണാണ്. ഇവിടെ ക്ലിക്ക് ചെയ്ത് പുതിയ ലേയര്‍ ഉണ്ടാക്കാം. Layer>New>Layer (Shift+Ctrl+N). ഇങ്ങനെ ലേയറുകള്‍ നിര്‍മ്മിച്ച് അതിന്മേല്‍ വരക്കുകയോ ഒക്കെ ചെയ്യാം. ഒന്നില്‍ ചെയ്യുന്നത് മറ്റൊരു ലേയറിനെ ബാധിക്കില്ല. ലേയറുകളില്‍ എന്തെങ്കിലും ചെയ്യും മുമ്പ് ആ ലേയര്‍ സെലക്റ്റ് ചെയ്യണം. അപ്പോള്‍ അത് ആക്റ്റീവ് ആകും. ആക്റ്റീവ് ആകുന്ന ലേയര്‍ നീല നിറത്തില്‍ ഹൈലൈറ്റാവും. വലത്തു നിന്നു ആദ്യത്തേത് ലേയറുകള്‍ ഡിലീറ്റ് ചെയ്യാനുള്ള ഐക്കണാണ്. അത് എങ്ങനെയെന്നു പിന്നെപ്പറയാം.

ലേയറുകള്‍ക്ക് പേരു നല്‍കുന്നത്…

സാധാരണ ഗതിയില്‍ നിങ്ങള്‍ ലേയറുകള്‍ ഉണ്ടാക്കുമ്പോള്‍ Layer1, Layer2 എന്നിങ്ങനെയാണ് പേരുകള്‍ വരാറ്. ഇത് ഓര്‍ത്തിരിക്കാന്‍ ഇമ്മിണി പ്രയാസള്ള നാമധേയങ്ങളാണല്ലോ. ആയതിനാല്‍ നിങ്ങള്‍ക്ക് ഇഷ്ടമുള്ള പേരു നല്‍കാം. പേരു മാറ്റേണ്ട ലേയറില്‍ (Layer1 അല്ലെങ്കില്‍ ലേയറിന്റെ പേര് ) സിമ്പ്ലി ഡബിള്‍ ക്ലിക്ക് ചെയ്യുക. എന്നിട്ടു പേരു മാറ്റിക്കൊടുത്തോളൂ. ഇനി ലേയറില്‍ Right Click ചെയ്ത്‍ Layer Properties എടുത്താല്‍ പേരും മാറ്റാം ലേയര്‍ എളുപ്പം തിരിച്ചറിയാന്‍ വേണ്ടി ഒരു കളറും നല്‍കാം.

ലേയറുകള്‍ സ്ഥാനം മാറ്റാന്‍…

ലേയറുകള്‍ ഒരിടത്തു നിന്നും മറ്റൊരിടത്തേക്ക് മാറ്റുന്നതിന് വേണ്ടി ആദ്യം ലേയര്‍ സെലെക്റ്റ് ചെയ്യണം. ഇതു പലരീതിയില്‍ ചെയ്യാം. എളുപ്പം ലേയര്‍ പാലറ്റില്‍ സെലെക്റ്റ് ചെയ്യേണ്ട ലേയറില്‍ ക്ലിക്ക് ചെയ്ത് ആക്റ്റീവ് ആക്കുകയാണ്. അല്ലെങ്കില്‍ ഡോകുമെന്റിലെ ലേയര്‍ ഓബ്ജെക്റ്റില്‍ (ഇമേജില്‍) മൂവ് ടൂള്‍ എടുത്ത് Right Click ചെയ്യുമ്പോള്‍ തെളിഞ്ഞു വരുന്ന ലേയറുകളുടെ പേരില്‍ നിന്ന് വേണ്ട ലേയര്‍ തെരഞ്ഞെടുക്കാം. Option Bar ല്‍ (Window>Options) Auto Select ചെക്ക് ചെയ്താല്‍ (മൂവ് ടൂള്‍ സെലെക്റ്റ് ചെയ്തിരിക്കണം) മൂവ് ടൂള്‍ കൊണ്ട് ചുമ്മാ വേണ്ട ലേയറില്‍ ക്ലിക്ക് ചെയ്താല്‍ ആ ലേയര്‍ സെലക്റ്റ് ആകും. (മൂവ് ടൂള്‍ എടുക്കുന്നതിനു V പ്രെസ്സ് ചെയ്താല്‍ മതി. നിങ്ങള്‍ ഏതു ടൂളില്‍ നിന്നാലും ആ ടൂള്‍ മാറ്റാതെ തന്നെ മൂവ് ടൂള്‍ വരുത്തുന്നതിന് Control കീ പ്രെസ്സ് ചെയ്താല്‍ മതി.) ഇനി മൌസ് ക്ലിക്ക് ചെയ്തു കൊണ്ട് എങ്ങോട്ടു വേണമെങ്കിലും ലേയറിനെ വലിച്ചു കൊണ്ടു പോകാം..ഐലസാ…

ലേയറുകള്‍ മറ്റു ലേയറുകള്‍ക്ക് താഴെയും മീതെയുമായി എങ്ങനെ ക്രമീകരിക്കാം? ലേയര്‍ പാലറ്റില്‍ നിന്ന് ലേയര്‍ സെലെക്റ്റ് ചെയ്ത് മറ്റു ലേയറുകളുടെ താഴേക്കോ മുകളിലേക്കോ Drag (വലിച്ചിട്ടാല്‍) മതി. ഇതിന്റെ ഷോട്കട്ട് Ctrl + ] (മുകളിലേക്ക്) Ctrl + [ (താഴേക്ക്). ഏറ്റവും മുകളിലേക്ക് Shift+Ctrl+], ഏറ്റവും താഴേക്ക് Shift +Ctrl+[.

ലേയറുകള്‍ കണ്ണടക്കുമ്പോള്‍…

ഒരു ലേയറിനെ ഡോകുമെന്റില്‍ ഡിലീറ്റ് ചെയ്യാതെ അപ്രത്യക്ഷമാക്കാന്‍ ലേയര്‍ പാലറ്റില്‍ ലേയറിനു നേരേയുള്ള കണ്ണിന്റെ പടത്തില്‍ ക്ലിക്ക് ചെയ്താല്‍ മതി. വീണ്ടും കാണാന്‍ ഒന്നൂടി ‘സൈറ്റടിക്കുക‘, കണ്ണില്‍ത്തന്നെ! നമ്മള്‍ സെലക്റ്റ് ചെയ്യുന്ന ലേയര്‍ ഒഴികെ മറ്റെല്ലാം അപ്രത്യക്ഷമാക്കാന്‍ കണ്ണില്‍ Alt Click ചെയ്താല്‍ മതി. ഒന്നുകൂടി ആള്‍ട്ടിയാല്‍ (Alt Click) എല്ലാം പഴയപടിയാകും.hide.jpg

ലേയറുകള്‍ കോപ്പി ചെയ്യുന്നത്…

ഒരു ലേയറിന്റെ ഡൂപ്ലിക്കേറ്റ് ഉണ്ടാക്കാ‍ന്‍ ലേയര്‍ സെലെക്റ്റ് ചെയ്തിട്ട് മെനുവില്‍ നിന്ന് Layer>Duplicate Layer. അല്ലെങ്കില്‍ ആ ലേയറിനെ ലേയര്‍ പാലറ്റിന്റെ താഴേയുള്ള New ഐക്കണിലേക്ക് വലിച്ചിടുക, അതുമല്ലെങ്കില്‍ കണ്‍ ട്രോളും ആള്‍ട്ടും അമര്‍ത്തിപ്പിടിച്ച് മൌസ് ക്ലിക്ക് ചെയ്ത് കൊണ്ട് മൂവ് ചെയ്യുക.

ലേയര്‍ ഡിലീറ്റ് ചെയ്യാന്‍…

സെലെക്റ്റ് ചെയ്ത ലേയറിനെ ലേയര്‍ പാലറ്റിന്റെ താഴെ ചവറ്റുകുട്ടയുടെ മാതിരിയുള്ള ഐക്കണിലേക്ക് ചുമ്മാ വലിച്ചിടുക. അല്ലെങ്കില്‍ Layer>Delete> Layer.

ലേയറിന്റെ ഒപാസിറ്റി മാറ്റാന്‍…

opacity.jpg

ഒപക് എന്നാല്‍ അതാര്യമായത്…ഒപാസിറ്റിയോ..അതാര്യത…(ആണോ?) അതാര്യമായത് അതിന്റെ പിന്നിലുള്ള മറ്റൊന്നിനെ മറയ്ക്കുന്നു. ലേയര്‍ 100% ഒപക് ആണെങ്കില്‍ താഴെയുള്ള ലേയറുകള്‍ പൂര്‍ണ്ണമായും മറയും. അപ്പോള്‍ ഒപാസിറ്റിയുടെ ശതമാനം മാറ്റുന്നതനുസരിച്ച് അടിയിലുള്ള ലേയര്‍ പ്രത്യക്ഷമാകാന്‍ തുടങ്ങും. 10% ഒപാസിറ്റി നിങ്ങള്‍ കൊടുത്തു എന്നിരിക്കട്ടെ, ഒരു കണ്ണാടിയിലൂടെ എന്ന പോലെ താഴെയുള്ള ലേയര്‍ കാണാം. ഒപാസിറ്റി കണ്‍ ട്രോള്‍ ഇമേജ് എഡിറ്റിംഗില്‍ ഒരുപാട് പ്രാധാന്യമുള്ള ഓരേര്‍പ്പാടാണ്. ഒരു ലേയറിന്റെ ഒപാസിറ്റി ചെയ്ഞ്ച് ചെയ്യാന്‍ ലേയര്‍ പാലറ്റിലെ Opacity എന്നിടത്ത് വേണ്ട വില (Value) ശതമാനക്കണക്കില്‍ കൊടുത്താല്‍ മതി. അല്ലെങ്കില്‍ അവിടെയുള്ള സ്ലൈഡര്‍ നിരക്കി നീക്കിയാല്‍ മതി. ഒപാസിറ്റി കുറയുംതോറും ലേയര്‍ Transparent ആയിക്കൊണ്ടിരിക്കും.

കുറെ ലോക്കുകള്‍

ലേയര്‍ പാലറ്റിന്റെ മുകളില്‍ കറെ ലോക്കുകള്‍ കാണാം.

lock-trans.jpg

ചിത്രം ശ്രദ്ധിക്കുക. ഇടത്തു നിന്നു ആദ്യം കാണുന്നത് Lock Transparent Pixels പിന്നെ Lock Image Pixels, Lock Position, Lock All എന്നിവയും കാണാം.
Lock Transparent Pixels ന്റെ പ്രവര്‍ത്തനം നോക്കാം. പഴയ വേര്‍ഷനുകളില്‍‍ ഇത് Preserve Transparency എന്നാണുള്ളത്. ഒരു ഡോകുമെന്റിലെ ലേയര്‍ എല്ലായ്പ്പോഴും ആ ഡോകുമെന്റിന്റെ വലിപ്പം തന്നെ ഉള്ളതായിക്കൊള്ളണമെന്‍ില്ല. താഴെ തൊപ്പിക്കാരന്റെ പടം നോക്കുക. ഈ ലേയറില്‍ പടം ഉള്ള ഭാഗത്തു മാത്രമാണ് അത്രയും Pixels ഉള്ളത്‌. ഡോകുമെന്റിന്റെ ബാക്കി ഭാഗം അതേ ലേയറില്‍ത്തന്നെ ശൂന്യം അഥവാ Transparent ആണ്. Lock Transparent Pixels ക്ലിക്ക് ചെയ്താല്‍ Pixels അഥവാ പടം ഉള്ള ഭാഗത്തു മാത്രമേ എന്തെങ്കിലും വരക്കാനോ പെയിന്റടിക്കാനോ ഒക്കെ പറ്റൂ. ബാക്കി സ്ഥലത്ത് ഒന്നും ഏശില്ല.
രണ്ട് ഉദാഹരങ്ങളിലൂടെ ഇത് വ്യകതമാകും.

pres-1.jpg

ഒന്നാമത്തെ ചിത്രത്തില്‍ തൊപ്പിക്കാരന്റെ തൊപ്പിയില്‍ കറുപ്പ് നിറം പെയിന്റ് ചെയ്യുമ്പോള്‍ ചുറ്റുഭാഗങ്ങളിലും പെയിന്റ് വീഴുന്നു. Lock Transparent Pixels ഇവിടെ ഓഫ് ആണ്. എന്നാല്‍ രണ്ടാമത്തെ ചിത്രത്തില്‍

pres-2.jpg
Transparent Pixels ഓണ്‍ ചെയ്തു വരക്കുമ്പോള്‍ തൊപ്പിക്കാരന്റെ ചിത്രത്തില്‍ മാത്രം പെയിന്റ് നിറയുന്നു. ഇത് ഏറെ ഉപയോഗമുള്ള ഒരു ഓപ്ഷനാണ്.

Lock Image Pixels എന്നാല്‍ ഇമേജില്‍ ഒരു പണിയും നടക്കില്ല. എന്നാല്‍ ലേയറിനെ എവിടേക്കും കൊണ്ടുപോകാം.

Lock Position എന്നാല്‍ ലേയറിനെ എവിടേക്കും നീക്കാനോ അനക്കാനോ കഴിയില്ല. എന്നാല്‍ ഇമേജില്‍ വ്യത്യാസങ്ങള്‍ വരുത്താം. വരക്കാം, തുടക്കാം ഇ റ്റി സി…..

Lock All ഓണ്‍ ചെയ്താല്‍ ഒണ്ണുമേ സെയ്യ മുടിയാത്…അപ്പടിയേ ലോക്കായിടുവേന്‍….

ബ്ലെന്‍ഡിംഗ് ഓപ്ഷനുകള്‍

ലേയര്‍ പാലറ്റിനു മുകളില്‍ ഇടതു വശത്ത് Normal എന്നു കാണുന്നില്ലേ. അവിടെ ക്ലിക്ക് ചെയ്താല്‍ ഒരു ഡ്രോപ് ഡൌണ്‍ മെനു അങ്ങിറങ്ങി വരും.

blending-mode.jpg

ഒത്തിരി ബ്ലെന്‍ഡിംഗ് മോഡുകളുടെ ഒരു നീണ്ട ലിസ്റ്റ് അവിടെ കാണാം. എല്ലാം ഇപ്പോള്‍ വിശദീകരിക്കുന്നില്ല. Overlay, Soft Light, Hard Light ഇവയൊക്കെ റിയലിസ്റ്റിക് ലൈറ്റ് ഇഫക്റ്റുകള്‍ ഉണ്ടാക്കാന്‍ നല്ലതാണ്. ഈ ബ്ലെന്‍ഡിംഗ് മോഡുകളുടെ പ്രവര്‍ത്തനവും വ്യത്യാസവും മനസിലാക്കാന്‍ എളുപ്പവഴി നിങ്ങള്‍ ലേയറിന്റെ ബ്ലെന്‍ഡിംഗ് മോഡ് മാറ്റിമാറ്റി കളിക്കുകയാണ്. അഡ്വാന്‍സ് ഡ് ലേയര്‍ ടെക് നിക് പറയുന്ന സമയത്ത് ഓരോ മോഡും വിശദീകരിക്കാം.

സുഹൃത്തുക്കളേ , ഇതൊരു ആമുഖം മാത്രമാണ്. ലേയറുകള്‍ എന്തെന്ന് അറിയാന്‍ മാത്രം. അഡ്വാന്‍സ് ഡ് ലേയര്‍ ടെക് നിക്സ് പിന്നാലെ പ്രതീക്ഷിക്കാം.

16അഭിപ്രായങ്ങള്‍ »

  1. ഫോട്ടോഷോപ്പ് ലേയറുകള്‍: ഒരാമുഖം.

    ഫോട്ടോഷോപ്പിന്റെ മര്‍മ്മപ്രധാനമായ പ്രത്യേകതകളില്‍ ഒന്നാണ് ലേയറുകള്‍. കോംപ്ലക്സ് ഇമേജുകള്‍ നിര്‍മ്മിക്കുവാന്‍ ഉപയോഗിക്കുന്ന അടിസ്ഥാന ഫീച്ചര്‍. തുടക്കക്കാരെ ഒത്തിരി കുഴക്കുന്ന ജഗജില്ലി. ഒന്നു വഴങ്ങിക്കിട്ടാന്‍ ഇശ്ശി സമയമെടുത്തെന്നിരിക്കും. പരിഭ്രമിക്കേണ്ട. ലേയറുകളുടെ അടിസ്ഥാന പ്രവര്‍ത്തനങ്ങള്‍ മനസ്സിലാക്കി നന്നായി പരിശീലിച്ചാല്‍ സംഗതി നിങ്ങളുടെ വിളിപ്പുറത്തു വരും. (ങാഹാ, അത്രക്കായോ!)

    അഭിപ്രായം by ziya — ഡിസംബര്‍ 27, 2006 @ 12:14 pm

  2. പ്രിയ സിയ
    എങ്ങനെ അഭിനന്ദിക്കണമെന്നറിയില്ല . നിന്‍റെ എല്ലാ പോസ്റ്റും ഞാന്‍ പ്രിന്‍റെടുത്ത് വിശദമായി തന്നെ വായിച്ചു. വളരെ രസകരമായി ഫോട്ടോഷോപ്പിനെ കുറിച്ച് വിശദമാക്കിയതില്‍ അഭിനന്ദനങ്ങള്‍ , മാത്രമല്ല ഫോട്ടോഷോപ്പില്‍ ഇത്തിരിമാത്രം പരിജ്ഞാനമുള്ള എനിക്ക് ഒത്തിരി കൂടി കൂടി , ബൂലോകത്തില്‍ വളരെ വിരളമായ വിജ്ഞാനപ്രദമായ ബ്ലോഗുകളില്‍ ഒന്നായി ഞാന്‍ ഇതിനെ കാണുന്നു .. സിയയുടേ പഠിപ്പിക്കലിന് ശേഷം ഞാന്‍ സംശയങ്ങള്‍ ചോദിക്കാം മറ്റൊരു പോസ്റ്റിനായി കാത്തിരിക്കുന്നു
    സസ്നേഹം ഫാറൂഖ്

    അഭിപ്രായം by വിചാരം — ഡിസംബര്‍ 27, 2006 @ 12:40 pm

  3. നന്ദി വിചാരം. സംശയ നിവാരണത്തിനായി ഒരു ബ്ലോഗ് പരിഗണയിലുണ്ട്. തുടങ്ങിയാലോ?

    അഭിപ്രായം by ziya — ഡിസംബര്‍ 27, 2006 @ 2:32 pm

  4. ഈ പോസ്റ്റ്‌ എനിക്കും പഠിക്കാന്‍ പാകത്തിനുള്ളതാണെന്ന്‌ തോന്നുന്നു. ചെയ്തുകഴിഞ്ഞ്‌ മറ്റൊരു കമെന്റ്‌ തീര്‍ച്ചയായും ഇടാം.
    നന്ദി സിയാദ്‌

    അഭിപ്രായം by കേരളഫാര്‍മര്‍ — ഡിസംബര്‍ 27, 2006 @ 2:40 pm

  5. സദയം ശ്രദ്ധിക്കുമല്ലോ..:

    1) *കഴിവതും* പിന്മൊഴി ഗൂഗിള്‍ ഗ്രൂപ്പിലേക്ക് നേരിട്ട് ഈ-മെയിലുകള്‍ എഴുതാതിരിക്കുക.

    2) gimp നെ പറ്റിയും എഴുറ്റുവാന്‍ താങ്കള്‍ക്ക് കഴിയുമോ?

    3) കുറച്ചു ബാനറുകള്‍ വേണമായിരുന്നു, തനിമലയാളം.ഓര്‍ഗ്ഗിനു — കേരളത്തില്‍ നിന്നുള്ള ചിത്രങ്ങളുടെ പശ്ചാത്തലത്തിലുള്ളവ — സഹായിക്കാമോ? ദാ ഇതു പോലുള്ളവയാണു ഉദ്ദേശിച്ചത്.

    നന്ദി..!

    അഭിപ്രായം by ഏവൂരാന്‍ — ഡിസംബര്‍ 27, 2006 @ 2:42 pm

  6. ലെയര്‍ ലോക്കുകളെക്കുറിച്ചുള്ള അറിവ് ഉപകാരപ്രദമായി..
    നന്ദി.

    അഭിപ്രായം by ikkaas — ഡിസംബര്‍ 28, 2006 @ 4:52 am

  7. ഏവൂരാന്‍ ചേട്ടാ,
    തീര്‍ച്ചയായും GIMP നെ കുറിച്ചു ആര്‍ട്ടിക്കിള്‍ എഴുതുന്നതാണ്‍. ഓപണ്‍ സോഴ്സ് സംരഭങ്ങളിലുള്ള മികച്ച പ്രോഗ്രാമുകള്ക്ക് നല്ല പ്രചാരം കിട്ടേണ്ടതുണ്ട്.

    അഭിപ്രായം by ziya — ഡിസംബര്‍ 28, 2006 @ 5:56 am

  8. ലെയറുകളെകുറിച്ച് എല്ലാമറിയാമെന്നായിരുന്നു എന്റെ വിചാരം. ഈ പോസ്റ്റ് വായിച്ചപ്പോഴാണ് അറിയാവുന്നതില്‍ കൂടുതല്‍ അറിയുവാനുണ്ട് എന്ന് മനസിലായത്.

    അറിവുകള്‍ മറ്റുള്ളവര്‍ക്ക് കഴിവതും പകര്‍ന്നുകൊടുക്കാതിരിക്കുന്ന ഈ കാലത്ത് തങ്കളുടെ ഈ സംരംഭം അഭിനന്ദനങ്ങള്‍ അര്‍ഹിക്കുന്നു. അടുത്ത പോസ്റ്റിനുവേണ്ടികാത്തിരിക്കുന്നു.
    (കമന്തുകളുടെ ഫോണ്ട് സൈസ് തീരെ കുറവാണ്)

    അഭിപ്രായം by ശാലിനി — ഡിസംബര്‍ 28, 2006 @ 6:08 am

  9. ഉമേഷേട്ടാ, ചന്ദ്രേട്ടാ, പെരിങ്ങോടരേ, ഏവൂരാനേ….
    വേഡ് പ്രെസ്സില്‍ കമെന്റുകളുടെ ഫോണ്ട് സൈസ് കൂട്ടാന്‍ എന്തു ചെയ്യണം?

    അഭിപ്രായം by ziya — ഡിസംബര്‍ 28, 2006 @ 6:24 am

  10. സിയാദ്‌: വായിക്കുവാനാണ് ഫോണ്ട്‌ സൈസ്‌ കൂട്ടുവാനാഗ്രഹിക്കുന്നതെങ്കില്‍ View > Text Size > Larer OR Largest സെലക്ട്‌ ചെയ്താല്‍ മതി.

    അഭിപ്രായം by കേരളഫാര്‍മര്‍ — ഡിസംബര്‍ 28, 2006 @ 7:59 am

  11. സിയ നന്നായിരിക്കുന്നു. ഒന്നു കൂടി വായിച്ചിട്ട് സംശയങ്ങള്‍ ചോദിക്കാം.

    അഭിപ്രായം by Shiju — ഡിസംബര്‍ 28, 2006 @ 10:02 am

  12. Dear Siya,
    I don’t have words to thank you for your efforts. This was somethng which I thought I will never be able to understand. Waiting for the rest

    അഭിപ്രായം by indiaheritage — ഡിസംബര്‍ 28, 2006 @ 10:13 am

  13. good work man. great effort.
    മലയാളത്തില്‍ തന്നെ ഈ വിവരങ്ങള്‍ എഴുതിയത് നല്ല കാര്യം തന്നെ,

    ഒരു പ്രശ്നം നിലനില്കുന്നു.
    Photoshopഉം Illsutratorഉം മാത്രം പഠിച്ചാല്‍ Graphic Designer അകാന്‍ കഴിയില്ല. നൂതനമായ അവിഷകാര വൈവിധ്യങ്ങള്‍ കഴ്ചവെക്കാന്‍ വേണ്ട പ്രധാന ഘടകം ചിത്രം കൈകൊണ്ടു രജിക്കാന്‍ ഉള്ള കഴിവ് തന്നെയാണു. ഭാരതത്തില്‍ (കേരളത്തലും) പലപ്പോഴും Graphic Design ഒരു IT വിഷയമായി അണു കാണാറുള്ളത്. Graphic Design ഒരു Fine Arts subject തന്നെയാണു. കലകാരന്‍ ചെയ്യേണ്ട ജോലി IT കാരനെകൊണ്ടു ചെയുന്നതുകൊണ്ടാണു ഇന്നു Asianteലും Surya TVലും Kairaliലും ഓര്‍ക്കാനം വരുന്ന Graphics നാം കാണാന്‍ ഇടയാകുന്നത്.

    Contemporary Art Historyയും Design Fundamentalsഉം Typographyയും പടിക്കാത്ത മുടന്തന്‍ Graphic Designerമാരെ കൊണ്ടു കാലുകുത്താന്‍ സ്ഥലമില്ല. Mouse ഉപയോഗിക്കാന്‍ അറിയാവുന്നവനെല്ലാം Graphic Designer. സ്വന്തമായി പേപ്പറില്‍ ഒരു വര വരക്കാന്‍ കഴിയാത്തവന്മാരെല്ലാം ഇന്നു “Graphic Designer”മാര്‍ ആണു. ഇവരെ എല്ലാം Graphic Operators ആയി മാത്രമെ ഞാന്‍ കണാറുള്ളു.100 CV എടുത്തു മുന്നില്‍ വെച്ചാല്‍ അതില്‍ ഒന്നോ രണ്ടോ ഉണ്ടാകും ജോലിക്ക് വെക്കാന്‍ കൊള്ളാവുന്നതു്. പിന്നെയും ഉണ്ട് ചിലവുകള്‍. Clientന്റെ Product Line പഠിക്കാന്‍ ഇവനെ വിടണം Italyയിലും Parisലും. ഇവന്‍ തിരികെ വന്നാല്‍ നമ്മള്‍ രക്ഷപെട്ടു. മുങ്ങിയല്‍ നമ്മള്‍ തെണ്ടും. എന്നാല്‍ നാട്ടില്‍ കാ കാശിനു കൊള്ളാവുന്ന വല്ല Design Institutesവല്ലതും ഉണ്ടോ? ഇല്ല. ഉണ്ട് Photoshopഉം Illustratorഉം പഠിപ്പിക്കുന്ന കച്ചവട സ്ഥാപനങ്ങള്‍.

    മനസിന്റെ വിഷമം കൊണ്ടു പറഞ്ഞുപോയതാണു് കേട്ടോ.

    വിഷയം Photoshopഉം Illsutratorഉം പഠിപ്പിക്കലാണെങ്കിലും, Design എന്താണെന്നു കൂടി അനിയന്മാരെയും /അനിയത്തിമാരെയും പഠിപ്പിക്കണം.

    അതായത് പേന ഉപയോഗിക്കാന്‍ മാത്രം പഠിപ്പിക്കാതെ പേനകൊണ്ടു കവിത എഴുതാനും പഠിപ്പിക്കണം എന്ന്.

    സസ്നേഹം.

    കൈപ്പള്ളി

    അഭിപ്രായം by കൈപ്പള്ളി — ഡിസംബര്‍ 28, 2006 @ 1:26 pm

  14. കൈപ്പള്ളിയുടെ അതേ അഭിപ്രായങ്ങള്‍ തന്നെയാണ്‍ എനിക്കുമുള്ളത്. എന്റെ വിഷയം ഫൊട്ടോഷോപ്പും ഇല്ലസ്ട്രേറ്ററും മാത്രം പഠിപ്പിക്കലല്ല.
    “Contemporary Art Historyയും Design Fundamentalsഉം Typographyയും പടിക്കാത്ത മുടന്തന്‍ Graphic Designerമാരെ കൊണ്ടു കാലുകുത്താന്‍ സ്ഥലമില്ല. Mouse ഉപയോഗിക്കാന്‍ അറിയാവുന്നവനെല്ലാം Graphic Designer. സ്വന്തമായി പേപ്പറില്‍ ഒരു വര വരക്കാന്‍ കഴിയാത്തവന്മാരെല്ലാം ഇന്നു “Graphic Designer”മാര്‍ ആണു.”
    ഈ അഭിപ്രായം പണ്ടേ പറയുന്നവനാണ്‍ ഞാന്‍. “വാളെടുക്കുന്നവനെല്ലാം വെളിച്ചപ്പാട്”!
    കൈപ്പള്ളി ഈ ബ്ലോഗ് മുഴുവനും വായിച്ചില്ല. ഇതിന്റെ ആമുഖം ഒന്നു വായിച്ചു നോക്കുക. …”ഗ്രാഫിക് ഡിസൈനിംഗും ഡെസ്ക് ടോപ് പബ്ലിഷിംഗും പഠിക്കാം എന്ന ഈ പഠന പരമ്പരയിലേക്ക് സ്വാഗതം.
    ആദ്യമായി ഈ കോഴ്സിന്‍റെ ഘടനയെക്കുറിച്ച് ഒന്നു വിശദീകരിക്കാം.
    ഏവര്‍ക്കും ഒട്ടൊക്കെ പരിചിതമാണ് ഡി.റ്റി.പി യും ഗ്രാഫിക് ഡിസൈനിംഗും. എന്നാല്‍ ശരിയായ രീതിയില്‍, തികഞ്ഞ പ്രൊഫഷണല്‍ സമീപനത്തോടെ ഈ രംഗത്ത് കടക്കുന്നവര്‍ ഒട്ടേറെ വസ്തുതകള്‍ അറിഞ്ഞിരിക്കേണ്ടതുണ്ട്……എന്നു തുടങ്ങുന്ന ആമുഖത്തില്‍ “ അധ്യായങ്ങളുടെ ഗണത്തില്‍പ്പെടുത്താതെ സോഫ്റ്റ്വെയര്‍ ടിപ്സ്&ട്രിക്സ്, റ്റൂട്ടോറിയത്സ്, അസൈന്മെന്‍സ്, ഗ്രാഫിക്സ്-ഗ്രാഫിക്സ് സോഫ്റ്റ്വെയര്‍-ഗ്രാഫിക്സ്, ഡെസ്ക് ടോപ് പബ്ലിഷിംഗ് വ്യവസായം തുടങ്ങിയവയെക്കുറിച്ചുള്ള രസകരമായ വിവരങ്ങള്‍ എന്നിവയെല്ലാം ഉള്‍പ്പെടുത്തിക്കൊണ്ടുള്ള സ്പെഷല്‍ പോസ്റ്റുകള്‍ ഇടക്കിടെ പബ്ലിഷ് ചെയ്യുന്നതാണ്.” എന്നാണുള്ളത്. അതായത് കൈപ്പള്ളി പറഞ്ഞ കാര്യങ്ങള്‍ ഞാന്‍ പറഞ്ഞു കൊണ്ടിരിക്കുമ്പോള്‍ത്തന്നെ എല്ലാത്തരം വായനക്കാരുടെയും ആവശ്യങ്ങള്‍ കണ്ടറിഞ്ഞ് ഇത്തരം ഗ്രാഫിക് സോഫ്റ്റ് വെയര്‍ പാഠങ്ങള്‍ പോസ്റ്റു ചെയ്യുമെന്ന് സാരം.

    അഭിപ്രായം by ziya — ഡിസംബര്‍ 28, 2006 @ 1:57 pm

  15. കൈപ്പള്ളി അദ്ധ്യായങ്ങളും വായിച്ചില്ലെന്നു തോന്നുന്നു. ഒന്നും രണ്ടും അദ്ധ്യായങ്ങള്‍ വായിക്കുക. ഗ്രാഫിക് ഡിസൈനിംഗ് മാത്രമല്ല ഡി റ്റി പി യക്കുറിച്ചും ഞാന്‍ ഈ പാഠങ്ങളില്‍ പറയുവാന്‍ ഉദ്ദേശിക്കുന്നു. ഡിസൈന്‍ എന്തെന്നോ അതിന്റെ അടിസ്ഥാന പാഠങ്ങളോ അറിയാത്ത “ഗ്രാഫിക് ഡിസൈനെര്‍”മാരെക്കൊണ്ട് ശ്വാസം മുട്ടുന്നു കേരളം. അതിനാല്‍ത്തന്നെ എന്റെ ഈ ബ്ലോഗില്‍ ഡിസൈന്‍ ചരിത്രം, ഡിസൈന്‍ അടിസ്ഥാന പ്രമാണങ്ങള്‍, നിയമങ്ങള്‍ , ഡി റ്റി.പി റൂള്‍സ്, ഡിസൈനിംഗില്‍ പാലിക്കേണ്ട സുപ്രധാന സംഗതികള്‍, ലോഗോ ഡിസൈന്‍ പ്രമാണങ്ങള്‍, നിറങ്ങളും അവയുടെ നിര്‍വ്വചനങ്ങളും, റ്റൈപൊഗ്രാഫി..റ്റൈപോഗ്രാഫിയുടെ നിയമങ്ങള്‍ തുടങ്ങി ഒട്ടന്വധി കാര്യങ്ങള്‍ ഉണ്ടാവുക തന്നെ ചെയ്യും. അതു തന്നെയാണ്‍ ലക്ഷ്യവും. അതിനിടയിലൂടെ നേരത്തേ പറഞ്ഞ ടിപ്സ് ആന്‍ഡ് റ്റ്രിക്സ്. കൈപ്പള്ളി തീര്‍ച്ചയാ‍യും ഈ കമെന്റിനു മറുപടി കുറിക്കണം.

    അഭിപ്രായം by ziya — ഡിസംബര്‍ 28, 2006 @ 2:20 pm

  16. എന്റെ ബ്ലോഗ്‌ സന്ദര്‍ശിക്കില്ലേ?

    അഭിപ്രായം by bnsubair — ഡിസംബര്‍ 28, 2006 @ 3:14 pm

Sep 4, 2008

ഫോട്ടോയില്‍ നിന്ന് പെന്‍സില്‍ സ്കെച്ചുകള്‍…


po2pi1.jpg

ഒരു ഫോട്ടോ അല്ലെങ്കില്‍ മറ്റെന്തെങ്കിലും ഇമേജ് പെന്‍സില്‍ സ്കെച്ചോ വാട്ടര്‍ കളര്‍ അല്ലെങ്കില്‍ എണ്ണച്ചായാ ചിത്രമോ ആക്കി മാറ്റാന്‍ എന്തു ചെയ്യും? Filter…!
അതെ ഫില്‍ട്ടെര്‍ ഉണ്ട്, പക്ഷേ നിങ്ങള്‍ കൈ കൊണ്ടു തന്നെ വരക്കേണ്ടി വരും. ഫോട്ടോഷോപ്പിലെ സ്കെച്ച് ഫില്‍റ്റര്‍ വളരെ നിരാശാജനകമായ ഫലമാണ് തരുന്നത്. എന്നാലിതാ ചിത്രകാരന്മാര്‍ അല്ലത്തവര്‍ക്കും അനായാ‍സം ചിത്രങ്ങള്‍ വരക്കാനായി ചിത്രകലയുടെ സാമ്പ്രദായിക വിദ്യകള്‍ അനുവര്‍ത്തിച്ചു കൊണ്ടുള്ള ഒരു തകര്‍പ്പന്‍ വിദ്യ!
ചിത്രകാരനായിരിക്കണമെന്നു നിര്‍ബന്ധമില്ലെങ്കിലും ചിത്രകലയുടെ പ്രത്യേകിച്ച് പെന്‍സില്‍ സ്കെച്ചിന്റെ അടിസ്ഥാന തത്വങ്ങള്‍ അറിഞ്ഞിരിക്കുന്നത് ഇവിടെയും ഗുണം ചെയ്യും.

ഫോട്ടോയില്‍ നിന്ന് പെന്‍സില്‍ സ്കെച്ചിലേക്ക്…

1) ഫോട്ടോഷോപ്പില്‍ നിങ്ങളുടെ ഇമേജ് തുറക്കുക.
Layer മെനുവില്‍ പോയി New Fill Layer ക്ലിക്ക് ചെയ്ത് Solid Color സെലെക്റ്റ് ചെയ്യുക. പേര് ലൈറ്റ് ഗ്രേ എന്നു കൊടുക്കുക.OK പറയുക. കളര്‍ പിക്കറില്‍ നിന്ന് ലൈറ്റ് ഗ്രേ തെരഞ്ഞെടുക്കുക.

po2pi3.jpg
2) Layer Palette നു താഴെയുള്ള “Create new fill or adjustment layer” ക്ലിക്ക് ചെയ്ത് അതില്‍ നിന്ന്
Pattern തെരഞ്ഞെടുക്കുക.
new1.jpg
അവിടെ പാറ്റേണ്‍ കാണിക്കുന്ന ചെറിയ ചതുരത്തില്‍ ക്ലിക്ക് ചെയ്താല്‍ വരുന്ന Pattern Swatch ഡയലോഗ് ബോക്സില്‍ വലത്തോട്ടുള്ള arrow ക്ലിക്ക് ചെയ്ത് Grayscale paper സെലക്റ്റ് ചെയ്യുക. new2.jpg
Swatch ല്‍ നിന്നും Fiber 1 തെരഞ്ഞെടുക്കുക. Pattern Scale 340% ആയി കൂട്ടുക. ഈ ലേയറിന്റെ Blending Mode Soft Light ആയി സെറ്റ് ചെയ്തിട്ട് Opacity 35% ആക്കുക.

po2pi4.jpg

3) നിങ്ങളുടെ Background Layer റൈറ്റ്ക്ലിക്ക് ചെയ്ത് Duplicate Layer സെലക്റ്റ് ചെയ്ത് ബാക്ക് ഗ്രൌണ്ട് ലേയറിന്റെ ഡ്യൂപ്ലിക്കേറ്റ് ഉണ്ടാക്കുക. ആ ലേയറിന് Glowing Edges എന്നു പേരു കൊടുക്കുക. ആ ലേയറിനെ ഏറ്റവും മുകളിലത്തെ ലേയര്‍ ആക്കുക. (win: shift+ctrl+] Mac:shift+cmd+] Mac)
ശേഷം Filter മെനുവില്‍ പോയി Stylize > Glowing Edges എടുത്ത് ഇനിപ്പറയുന്ന വാല്യൂ നല്‍കുക.
Edge Width 3, Edge Brightness 11, Smoothness 10.
po2pi5.jpg


4) Glowing Edges എന്ന ലേയറിനെ Invert ചെയ്യുക.
po2pi5-5.jpg

Image > Adjustments > Invert (Ctrl/Cmd+I) .

ഈ ലേയെര്‍ ബ്ലാക്ക്&വൈറ്റ് ആയിരുന്നാല്‍ മതി. അതിനു വേണ്ടി ഇമേജ് മെനുവില്‍ പോയി ഡീസാചുറേറ്റ് ചെയ്യുക.Image > Adjustments > Desaturate (Ctrl/Cmd+Shift+U).
ഈ ലേയറിന്റെ blending mode “Multiply” ആക്കി opacity 15% ആയി സെറ്റ് ചെയ്യുക.

5)Background Layer ഒരിക്കല്‍ കൂടി ഡ്യൂപ്ലിക്കേറ്റ് ചെയ്യുക. ആ ലേയറിന് Sketch Layer എന്നു പേരു കൊടുത്ത് ഏറ്റവും മുകളിലേക്ക് ഡ്രാഗ് ചെയ്യുക. ഇതിനെയും ഡീസാചുറേറ്റ് ചെയ്യുക.Image > Adjustments > Desaturate (Ctrl/Cmd+Shift+U). ഈ ലേയറിനെ നമ്മള്‍ ഡ്രോയിങിന്റെ base ആയി ഉപയോഗിക്കുന്നു. അല്പം Contrast കൂട്ടുന്നതു നന്നയിരിക്കും.
Image >Adjustments > Brightness and Contrast. വാല്യൂ
22 കൊടുക്കുക.Sketch Layer ന്റെ blending mode “Darken” ആക്കുക. ഒപാസിറ്റി നൂറു ശതമാനം തന്നെ ആയിക്കൊട്ടെ.

6) ഈ ലേയറിനു അല്പം Noise കൊടുക്കണം. Filter > Noise > Add Noise. എമൌണ്ട് പന്ത്രണ്ട് .Distribution എന്നിടത്ത് Gaussianകൊടുക്കുക. Monochromatic ബോക്സ് check ചെയ്യുക.

7) ഇനി ഈ ലേയറിനു ഒരു ഹൈഡ് ഓള്‍ ലേയര്‍മാസ്ക് കൊടുക്കണം.
Layer > Layer Mask > Hide All.

po2pi6.jpg
ഇനി നമുക്ക് വര തുടങ്ങാം. നമ്മള്‍ കൊടുത്ത ലേയര്‍മാസ്കില്‍ ഒരു പ്രത്യേക ബ്രഷ് കൊണ്ട് ചുമ്മാ ഉരച്ചാല്‍ മതി.
ആ പ്രത്യേക ബ്രഷ് എങ്ങനെ ഉണ്ടാക്കും?
8. ഏതെങ്കിലും ഒരു ബ്രഷ് സെലക്റ്റ് ചെയ്തിട്ട് ഓപ്ഷ്ന്‍ ബാറിലെ Brush Picker ല്‍ റൈറ്റ് ക്ലിക്ക് ചെയ്യുക.(ഡോകുമെന്റില്‍ റൈറ്റ് ക്ലിക്ക് ചെയ്താലും മതി) വലത്തോട്ടുള്ള arrow ക്ലിക്ക് ചെയ്ത് അവിടെ നിന്നും Dry Media Brushes സെലെക്റ്റ് ചെയ്യുക. എന്നിട്ടു Pastel on Charcoal Paper എന്ന ബ്രഷ് സെലക്റ്റ് ചെയ്യണം.

po2pi7.jpg


9) ഇനി ബ്രഷ് ഓപ്ഷന്‍സ് കാണുവാനായി F5 പ്രെസ്സ് ചെയ്യുക. അവിടെ Other Dynamics പാനെല്‍ എടുത്ത് Opacity Jitter Control– ‘Pen Pressure’ എന്നു സെറ്റ് ചെയ്യുക. ഇനി Shape Dynamics എടുത്ത് Size Jitter –‘Pen Pressure’ ആക്കണം.Minimum Diameter — 70% ആയി സെറ്റ് ചെയ്യുക.

ഓര്‍ക്കുക…
നിങ്ങളൊരു ഗ്രാഫിക് ടാബ്ലറ്റ് അല്ലാതെ മൌസ് ആണ് ഉപയോഗിക്കുന്നതെങ്കില്‍ ബ്രഷിന്റെ ഒപാ‍സിറ്റി ഓപ്ഷ്ന്‍ ബാറിലെ ഒപാ‍സിറ്റി സ്ലൈഡറില്‍ അഡ്ജസ്റ്റ് ചെയ്യണം.
Foreground color White ആണെന്നു ഉറപ്പു വരുത്തുക.(ഹൈഡ് ഓള്‍ ലേയര്‍മാസ്കില്‍ ക്ലിക്ക് ചെയ്യുമ്പോള്‍ തനിയെ White ആകുന്നതാണ്.

10) ഇനി വര തുടങ്ങാം.
ഓപ്ഷ്ന്‍ ബാറില്‍ ബ്രഷ് സൈസ് ഇരുപത്-ഇരുപത്തിഅഞ്ച് പിക്സത്സിന് ഇടയില്‍ നിജപ്പെടുത്തുക.ആദ്യം ഫോട്ടോയുടെ facial features ല്‍ കൂടുതല്‍ ശ്രദ്ധിക്കുന്നതിനായി ബ്രഷിന്റെ ഒപാസിറ്റി നന്നേ കുറച്ചു വേണം വരച്ചു തുടങ്ങാന്‍. വളരെ ലൂസ് ആയി ഫോട്ടോയുടെ എല്ലാ ഭാഗത്തും ബ്രഷ് കൊണ്ട് ഉരക്കണം.കൈ കൊണ്ട് ഷെയ്ഡ് ചെയ്ത പ്രതീതി കിട്ടാന്‍ ബ്രഷിന്റെ ഡയറക്ഷന്‍ ഇടക്കിടെ മാറ്റണം. ഡയറക്ഷന്‍ മാറ്റാന്‍ F5 പ്രെസ്സ് ചെയ്ത് ബ്രഷ് ഓപ്ഷന്‍സ് എടുത്ത് Brush Tip Shape ലെ Angle മാറ്റിയാല്‍ മതി.

11) സ്ട്രോക്കുകള്‍ ഓവര്‍ലാപ് ചെയ്യുന്നിടത്ത് ധാരാളം ക്രോസ്സ് ഹാ‍ച്ചുകള്‍ വരക്കണം. രസകമായ കാര്യം, വരക്കാനുള്ള യാതൊരു കഴിവും നിങ്ങള്‍ക്ക് വേണമെന്നില്ല എന്നാതാണ്. വെറുതേ ഉരച്ചു കൊണ്ടേ ഇരിക്കുക.

po2pi9.jpg

12) ഇടക്ക് ബ്രഷ് സൈസ് അല്‍പ്പം കൂട്ടി വരക്കുക (സോറി ഉരക്കുക!). ഫോട്ടോയുടെ features ഉം colour tones ഉം ശ്രദ്ധിക്കുക. tone കൂട്ടാന്‍ കൂടുതല്‍ ഉര മതിയല്ലോ, ഒപാസിറ്റിയും. മനോഹരമായി, ഫ്രീയായി വരക്കണം. മുടി, ചിത്രത്തിന്റെ പുറംഭാഗങ്ങള്‍ എന്നിവിടങ്ങളില്‍ അല്പം വലിയ ബ്രഷ് ഉപയോഗിക്കുകയും ഒരു സ്കെച്ചിലേതെന്ന പോലെ വരക്കുകയും വേണം.

po2pi-10.jpg

13) ഡീറ്റയിത്സ് വരക്കുന്നതിനു വേണ്ടി ശരിക്കും ഡാര്‍ക് സ്ട്രോക്കുകള്‍ തന്നെ വേണം. ബ്രഷിന്റെ സൈസ് കുറച്ചിട്ട് ഫുള്‍ ഒപാസിറ്റിയില്‍ ശ്രദ്ധയോടെ deatils ഉരച്ചു ചേര്‍ക്കുക.
po2pi2.jpg

പെന്‍സില്‍ സ്കെച്ച് റെഡി.

ഇനി ഈ മെതേഡില്‍ എന്തൊക്കെ മാറ്റം വരുത്തിയാല്‍ ഒരു വാട്ടര്‍ കളര്‍ അല്ലെങ്കില്‍ ഓയില്‍ പെയിന്റിങ് ചെയ്യാം എന്ന് നിങ്ങള്‍ തന്നെ ആലോചിച്ചു നോക്കൂ…
നിങ്ങളുടെ ക്ണ്ടെത്തലുകള്‍ കമന്റുകളായി പ്രതീക്ഷിക്കുന്നു.
Hint:ഫോട്ടോഷോപ്പില്‍ Wet Media Brushes ല്‍ വാട്ടര്‍ കളറിനും ഓയില്‍ പെയിന്റിംഗിനും വേണ്ട ബ്രഷുകള്‍ ലഭ്യമാണ്. Artistic Surface പാറ്റേണ്‍ പേപ്പറുകളും!!!

17 അഭിപ്രായങ്ങള്‍ »

  1. നിങ്ങളുടെ അഭിപ്രായങ്ങ്ലും നിദ്ദേശങ്ങളും വിനയപൂര്‍വം ക്ഷണിക്കുന്നു.

    അഭിപ്രായം by ziyaingraf — ഡിസംബര്‍ 6, 2006 @ 7:50 am

  2. സിയ
    വിഞ്ജാനപ്രദമായിട്ടുള്ള ഒരു ബ്ലോഗാണിത്
    ലളിതമായി എല്ലാം വിശദീകരിച്ചിരിക്കുന്നു
    അഭിനന്ദനങ്ങള്‍
    തല്‍ക്കാലം ഓഫീസിലിരുന്നു കൊണ്ട് ഇത്തരം പരീക്ഷണങ്ങള്‍ നടക്കില്ല. പിന്നീട് ചെയ്തു നോക്കി സംശയങ്ങള്‍ ദുരീകരിക്കാം
    തലക്കെട്ടില്‍ ഒരു നീലനിറം മാത്രമല്ലേയൊള്ളൂ. അവിടെ ഒരു പേരു കൂടി കൊടുത്തൂടെ. അതോ ഫയര്‍വാള്‍ കാരണം എനിക്കു കാണാന്‍ പറ്റാത്തതാണോ..

    അഭിപ്രായം by Siju — ഡിസംബര്‍ 6, 2006 @ 8:16 am

  3. Siju,
    നന്ദി.. തലക്കെട്ടില്‍ പേരുണ്ട്. firewall ആയിരിക്കും വില്ലന്‍!

    അഭിപ്രായം by ziyaingraf — ഡിസംബര്‍ 6, 2006 @ 8:19 am

  4. സിയ,

    കൊള്ളാം. വളരെ നന്നായി വിശദീകരിച്ചിരിക്കുന്നു. എന്റെ ഒരു സുഹൃത്ത് ഇങ്ങിനെ ഒരു ഫോട്ടോ പ്രൊഫൈലില്‍ ഇട്ടിരിക്കുന്നത് കണ്ടിരുന്നു. അവന്‍ ഒരു ഗ്രാഫിക് ഡിസൈനര്‍ ആണ്. എന്തായാലും ഇപ്പോള്‍ ആണ് ഇത് മനസ്സിലായത്.

    ഇനിയും കൂടുതല്‍ പോരട്ടെ….

    അഭിപ്രായം by മഴത്തുള്ളി — ഡിസംബര്‍ 6, 2006 @ 8:54 am

  5. നന്ദി മഴത്തുള്ളി. പിമൊഴിയില്‍ കമെന്റ് വരുന്നുണ്ടോ എന്നറിയില്ല. ഏതായാലും ഈ ബ്ലോഗ് പരമാവധി സുഹ്രുത്തുക്കളിലേക്ക് എത്തിക്കന്‍ സ്രമിക്കുമല്ലോ?

    അഭിപ്രായം by ziyaingraf — ഡിസംബര്‍ 6, 2006 @ 10:39 am

  6. Nice & Great Attempt. Very useful…Thanks a lot

    അഭിപ്രായം by Haroon — ഡിസംബര്‍ 6, 2006 @ 3:11 pm

  7. സിയ,

    ടൂള്‍സിലേക്ക് നേരിട്ട് പോകുന്നതിനു മുന്‍പ് ഇമേജസിനെകുറിച്ചുള്ള അടിസ്ഥാന പാഠങ്ങള്‍ തന്നു കൂടെ. ഉദാഹരണത്തിനു പല തരം ഇമേജ് ഫോര്‍മാറ്റുകള്‍ (ഉദാ: .jpg, .tiff, .png, .eps….), അവയുടെ merits and demerits, ഇനി നമ്മള്‍ ഒരു ഇമേജ് ഉണ്ടാക്കുമ്പോള്‍ എന്താണ് സംഭവിക്കുന്നത്. (pixels, resolution) ഇത്യാദി…

    അത് കഴിഞ്ഞിട്ടു പോരേ photoshop-നെ കുറിച്ച് പറയുന്നത്. എനിക്ക് തോന്നുന്നില്ല photoshop-ലെ layer-നെ കുറിച്ച് പലര്‍ക്കും അറിയാമെന്ന്.

    അഭിപ്രായം by shijualex — ഡിസംബര്‍ 7, 2006 @ 7:44 am

  8. വളരെ നാളുകളായി ആഗ്രഹിച്ചുകൊണ്ടീരുന്ന ഒന്നാണിത്. വളരെ വളരെ നന്ധി. ഫോട്ടോഷോപ്പ് കുറച്ചൊക്കെ അറിയാമെന്നേയുള്ളൂ.

    പെന്‍സില്‍ സ്കെച്ച് ഒരുപാടുനാളത്തെ ആഗ്രഹമാണ്. തിരക്കുപിടിച്ച് ചെയ്തതുകൊണ്ടാവാം ശരിയാകുന്നില്ല. ഇനി പതുക്കെ ഒന്നു ചെയ്തുനോക്കട്ടെ.

    വളരെ നന്നായി വിവരിച്ചിരിക്കുന്നു. തുടര്‍ന്നുള്ള പാഠങ്ങള്‍ക്കുവേണ്ടി കാത്തിരിക്കുന്നു.

    അഭിപ്രായം by Salini — ഡിസംബര്‍ 7, 2006 @ 8:37 am

  9. നന്ദി ഷിജു. ഷിജുവിന്റേതു പോലെയുള്ള അഭിപ്രായങ്ങള്‍ ഞാന്‍ പ്രതീക്ഷിച്ചതാണ്.
    ഞാന്‍ ആദ്യമേ പറഞ്ഞല്ലോ, അടിസ്ഥാന പാഠങ്ങള്‍ക്ക് പുറമേ ടിപ്സ്സുകളും മറ്റും സ്പെഷല്‍ പോസ്റ്റ് ആയി പബ്ലിഷ് ചെയ്യുമെന്ന്. അതിലൂടെ ഞാന്‍ ലക്ഷ്യം വെക്കുന്നത് നിലവില്‍ ഗ്രാഫിക് സോഫ്റ്റ്വെയര്‍ കൈകാര്യം ചെയ്യുന്നവരെയാണ്. തുടക്കക്കാര്‍ക്കയുള്ള പാഠങ്ങളില്‍ (ക്രമമായുള്ള അധ്യായങ്ങളില്‍ ) ഷിജു പറഞ്ഞ അടിസ്ഥാന വസ്തുതകള്‍ തീര്‍ച്ചയയും ഉണ്ടാകും. ശാലിനിക്ക് നന്ദി…തുടര്‍ ഭാഗങ്ങള്‍ ശ്രദ്ധിക്കുക.

    അഭിപ്രായം by ziyaingraf — ഡിസംബര്‍ 7, 2006 @ 10:47 am

  10. 2) Layer Palette നു താഴെയുള്ള “Create new fill or adjustment layer” ക്ലിക്ക് ചെയ്ത് അതില്‍ നിന്ന് Pattern തെരഞ്ഞെടുക്കുക. അവിടെ പാറ്റേണ്‍ കാണിക്കുന്ന ചെറിയ ചതുരത്തില്‍ ക്ലിക്ക് ചെയ്താല്‍ വരുന്ന Pattern Swatch ഡയലോഗ് ബോക്സില്‍ വലത്തോട്ടുള്ള arrow ക്ലിക്ക് ചെയ്ത് Grayscale paper സെലക്റ്റ് ചെയ്യുക. Swatch ല്‍ നിന്നും Fiber 1 തെരഞ്ഞെടുക്കുക. Pattern Scale 340% ആയി കൂട്ടുക. ഈ ലേയറിന്റെ Blending Mode Soft Light ആയി സെറ്റ് ചെയ്തിട്ട് Opacity 35% ആക്കുക.

    ഇത്രയും എഴുതിയ ശെഷം ഒരു ചിത്രം കൊടുത്താല്‍‍ ഹരി ശ്രീ ന്നു തോടങ്ങുന്നവര്‍ക്കു് ഉപകാരമാകും. അല്ലെങ്കില്‍‍ ഫൊട്ടോ ഷോപ്പിലെ പുലികള്‍ക്കേ ഇതു പ്രയോജനം ചെയ്യ്യ്യൂ. അതു പോലെ ഫോട്ടൊ ഷോപ്പിന്‍റെ ഏതു വെര്‍ഷനാണു്, ഉപയോഗിക്കഏണ്ടതു്.?
    സുഹൃത്തേ ഇന്നലെ മുതല്‍‍ layer pattern കണ്ടു പിടിക്കാന്‍ നോക്കിയിട്ടു് സാധിച്ചില്ല.
    qw_er_ty

    അഭിപ്രായം by വേണു — ഡിസംബര്‍ 7, 2006 @ 12:49 pm

  11. വേണു, ചിത്രങ്ങള്‍ upload ചെയ്തിട്ടുണ്ട്. Layer Pattern അല്ല Layer Palette.
    Window മെനുവില്‍ Layes ചെക്ക് ചെയ്യുക. ഫോട്ടോഷോപ്പ് ആറ്.അഞ്ച് അല്ലെങ്കില്‍ ഏഴ് മുതല്‍ ഉപയോഗിക്കാം. ഒന്നു കമന്റിയേക്കണേ…നന്ദി.

    അഭിപ്രായം by ziyaingraf — ഡിസംബര്‍ 7, 2006 @ 1:28 pm

  12. നന്ദി സിയാ.
    ഗ്രാഫിക് ഡിസൈനിങ്ങെന്ന് ബോര്‍ഡും വച്ച് ഫോട്ടോഷോപ്പില്‍ ചില്ലറ അഭ്യാസങ്ങളുമായി അരി മേടിക്കുന്ന എന്നെപ്പോലുള്ളവര്‍ക്ക് കൂടുതല്‍ പഠിക്കാന്‍ തികച്ചും സഹായകമാണ് സിയയുടെ ഈ ഉദ്യമം. നന്ദി.

    അഭിപ്രായം by ikkaas — ഡിസംബര്‍ 8, 2006 @ 10:15 am

  13. വളരെ വളരെ നന്ദി സിയ. ഇതുപോലൊന്ന് നോക്കിയിരിക്കുകയായിരുന്നു. അഡോബിയുടെ ഫോട്ടോഷോപ്പും ഇല്ല്യുസ്ട്രേറ്ററും വളരെയധികം വട്ടം കറക്കുന്നു.

    തുടര്‍ന്നും പ്രതീക്ഷിക്കുന്നു. സംശയങ്ങള്‍ ചോദിക്കാമല്ലോ അല്ലേ.

    അഭിപ്രായം by വക്കാരി — ഡിസംബര്‍ 14, 2006 @ 1:18 pm

  14. വക്കാരി മാഷേ നന്ദി…തുടര്‍ന്നും സഹകരണം പ്രതീക്ഷിക്കുന്നു.

    അഭിപ്രായം by ziyaingraf — ഡിസംബര്‍ 14, 2006 @ 1:40 pm

  15. കുറച്ചൊക്കെ വായിച്ചു. ചെയ്തുനോക്കാന്‍ സമയം കിട്ടിയില്ല. ഇനി ഇത്‌ സേവ്‌ ചെയ്ത്‌ വെച്ച്‌ പ്ന്നെ ശ്രമിക്കാം. നന്ദി.

    കൃഷ്‌ | krish

    അഭിപ്രായം by Radhakrishnan — ഡിസംബര്‍ 14, 2006 @ 2:23 pm

  16. Its wonderful..The Photoshop Super tricks…Expect more n more tricks…Congartulations siya…Thanks a lot

    അഭിപ്രായം by Ajay — ഡിസംബര്‍ 17, 2006 @ 6:49 am

  17. I had tried great …congrats

    അഭിപ്രായം by Deepu — ജനുവരി 27, 2007 @ 8:27 am